രോഹിത് ഷെട്ടി സംവിധാനം ചെയ്യുന്ന ‘സൂര്യവംശി’ എന്ന ബോളിവുഡ് ആക്ഷന്‍ ത്രില്ലറില്‍ അക്ഷയ് കുമാറാണ് നായകന്‍. മലയാളത്തിന്‍റെ അഭിമാനമായിരുന്ന ജയന്‍ ചെയ്ത രീതിയില്‍ ഹെലികോപ്‌ടറില്‍ തൂങ്ങി അക്ഷയ്കുമാര് നടത്തുന്ന സ്റ്റണ്ട് രംഗങ്ങള്‍ ഈ സിനിമയുടെ ഹൈലൈറ്റായിരിക്കും.
ചിത്രീകരണം തുടരുന്ന സിനിമയുടെ ആക്ഷന്‍ രംഗങ്ങളുടെ ചില സ്റ്റില്ലുകള്‍ അണിയറപ്രവര്‍ത്തകര്‍ പുറത്തുവിട്ടു. കുറച്ച് വര്‍ഷങ്ങളായി ആക്ഷന്‍ സിനിമകളില്‍ നിന്ന് അകന്നുനിന്ന അക്ഷയ് കുമാര്‍ തന്‍റെ പ്രിയപ്പെട്ട ജോണറിലേക്ക് മടങ്ങിവരികയാണ് സൂര്യവംശിയിലൂടെ.
ഒരു ആന്‍റി-ടെററിസ്റ്റ് സ്ക്വാഡ് ഓഫീസറായാണ് അക്ഷയ്കുമാര് ഈ സിനിമയില്‍ അഭിനയിക്കുന്നത്. കത്രീന കൈഫാണ് ചിത്രത്തിലെ നായിക. അജയ് ദേവ്ഗണും രണ്‍‌വീര്‍ സിംഗും ചിത്രത്തില്‍ കാമിയോ റോളുകളില്‍ എത്തുന്നു.
സിംഗം, സിംഗം റിട്ടേണ്‍സ്, സിംബ തുടങ്ങിയ പൊലീസ് ചിത്രങ്ങള്‍ക്ക് ശേഷം രോഹിത് ഷെട്ടി സംവിധാനം ചെയ്യുന്ന പൊലീസ് സ്റ്റോറിയാണ് സൂര്യവംശി.