നോയിഡ: തോക്ക് പിടിച്ച്‌ സെല്‍ഫിയെടുക്കുന്നതിനിടെ അബദ്ധത്തില്‍ വെടിപൊട്ടി 22 കാരന് ദാരുണാന്ത്യം. ഉത്തർപ്രദേശിലെ ഗ്രേറ്റർ നോയിഡയിലാണ് സംഭവം. സൗരഭ് എന്ന യുവാവാണ് മരിച്ചത്. സംഭവാത്തിൽ പരാതി ഒന്നും ലഭിച്ചിട്ടില്ല എന്നും ആപകട മരണമാണ് എന്നും പൊലീസ് വ്യക്തമാക്കി. സുഹൃത്തായ നകുലിനെ ചോദ്യം ചെയ്യാൻ പൊലീസ് വിളിച്ചുവരുത്തി എങ്കിൽ വിട്ടയയ്ക്കുകയായിരുന്നു.
സൗരഭും നകുലും ചേർന്ന് ഒരു സുഹൃത്തിന്റെ വിവാഹ ചടങ്ങിന് പോകുന്നതിനിടെയാണ് സംഭവം ഉണ്ടായത്. പാതിവഴിയിൽ വച്ച് സൗരഭ് ഒരു തോക്ക് പുറത്തെടുക്കുകയായിരുന്നു. ഇത് നിറ തോക്കായിരുന്നു എന്ന് സൗരഭിന് അറിയില്ലായിരുന്നു എന്നാണ് പൊലീസിന് ലഭിച്ച വിവരം. തോക്കിന്റെ സേഫ്റ്റി വാൽവ് ഓപ്പണ്‍ ആയിരുന്നതിനാല്‍ ഫോട്ടോയെടുക്കാന്‍ ശ്രമിക്കുന്നതിനിടെ അബദ്ധത്തില്‍ വെടിപൊട്ടുകയായിരുന്നു.
നെഞ്ചിനോട് ചേർന്ന് വെടിയേറ്റ സൗരഭിനെ ഉടന്‍ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിയ്ക്കാനായില്ല. ഗ്രേറ്റര്‍ നോയിഡയിലെ പ്രോപ്പര്‍ട്ടി ഇടപാടുകാരനാണ് സൗരഭിന്റെ അച്ഛൻ. ഇയാളുടെ കൈവശമുണ്ടായിരുന്ന തോക്കാണ് അപകടമുണ്ടാക്കിയത്. ഈ തോക്കിന് ലൈസന്‍സ് ഇല്ല എന്ന് വ്യക്തമായിട്ടുണ്ട്. തോക്ക് സൗരഭിന്റെ പക്കല്‍ എങ്ങനെയെത്തി എന്നത് സംബന്ധിച്ച്‌ അന്വേഷിക്കുമെന്ന് പൊലീസ് വ്യക്തമാക്കിയിട്ടുണ്ട്.