ലോകത്തെ ആകമാനം വിറപ്പിക്കുന്ന കൊവിഡ് 19ന്റെ പുതിയ കേന്ദ്രമാണോ ഇന്ത്യ എന്ന് സംശയിക്കേണ്ടിയിരിക്കുന്നു. ഇന്ത്യയെ ഭയപ്പെടുത്തി കൊറോണ ഇന്ത്യയിലും വ്യാപിക്കുകയാണ്. ഇന്ത്യയിലെ ഓരോ സംസ്ഥാനങ്ങളേയും കാർന്ന് തിന്നാനുള്ള പണിപ്പുരയിലാണ് വൈറസ് എന്ന് തന്നെ പറയാം.
തുടക്കത്തിൽ ഏറ്റവും അധികം കേസുകൾ സ്ഥിരീകരിച്ച കേരളം വൈറസിനെ നല്ല രീതിയിൽ പ്രതിരോധിച്ച് കൊണ്ടിരിക്കുകയാണ്. എന്നാൽ, ഈ പട്ടികയിൽ പേടിപ്പെടുത്തുന്നത് മഹാരാഷ്ട്രയിലേയും തമിഴ്നാട്ടിലേയും കണക്കുകളാണ്. രാജ്യത്ത് രോഗികളുടെ എണ്ണം ആയിരം പിന്നിടുന്ന ആദ്യ സംസ്ഥാനമായി മാറിയിരിക്കുകയാണ് മഹാരാഷ്ട്ര. ഇത് ഏറെ ഭയപ്പെടുത്തുന്ന കണക്കാണ്. കഴിഞ്ഞ ഇരുപത്തിനാലു മണിക്കൂറിനുള്ളില്‍ 150 കേസുകളാണ് റിപ്പോര്‍ട്ട് ചെയ്തിരിക്കുന്നത്.
മറ്റൊരു വുഹാനാകുമോ മഹാരാഷ്ട്രയെന്നാണ് ആശങ്ക.ചൈനയിലെ വുഹാന്‍ ആണ് കൊറോണവൈറസിന്റെ ഉത്ഭവം. 3,333 പേരാണ് ചൈനയില്‍ വൈറസ് ബാധിച്ച് മരിച്ചത്. 81,802 കേസുകളാണ് റിപ്പോര്‍ട്ട് ചെയ്തത്. രാജ്യത്ത് ഏറ്റവും കൂടുതല്‍ കൊവിഡ് കേസുകള്‍ റിപ്പോര്‍ട്ട് ചെയ്ത മഹാരാഷ്ട്രയാണ് ആശങ്ക സൃഷ്ടിച്ചിരിക്കുന്നത്. 1018 രോഗികളാണ് മഹാരാഷ്ട്രയിലുള്ളത്. മുംബൈയില്‍ മാത്രം 590 പേര്‍ക്കാണ് രോഗബാധ സ്ഥിരീകരിച്ചിരിക്കുന്നത്. ചൊവ്വാഴ്ച മുംബൈയില്‍ ആറു പേര്‍ മരിച്ചതോടെ മരണസംഖ്യ 40 ആയി ഉയര്‍ന്നു.
