നിങ്ങളുടെ നമ്പര്‍ 2 മണിക്കൂറിനുള്ളില്‍ വിച്ഛേദിക്കപ്പെടും! ഈ തട്ടിപ്പില്‍ വീഴരുത്, കേന്ദ്ര സര്‍ക്കാര്‍ മുന്നറിയിപ്പ്

ട്രായ്യില്‍ നിന്നുള്ളവരാണെന്ന് അവകാശപ്പെടുന്ന വ്യാജ കോളര്‍മാര്‍ക്കെതിരെ പൗരന്മാര്‍ക്ക് മുന്നറിയിപ്പ് നല്‍കി.

ടെലികോം റെഗുലേറ്ററി അതോറിറ്റി ഓഫ് ഇന്ത്യയില്‍ (ട്രായ്) നിന്നുള്ളതാണെന്ന്  അവകാശപ്പെടുന്ന വ്യാജ ഫോണ്‍ കോളുകള്‍ക്കെതിരെ സര്‍ക്കാര്‍  മുന്നറിയിപ്പ് നല്‍കി. കേന്ദ്ര സര്‍ക്കാരിന്റെ നോഡല്‍ ഏജന്‍സിയായ പ്രസ് ഇന്‍ഫര്‍മേഷന്‍ ബ്യൂറോയുടെ (പിഐബി) ഫാക്ട്-ചെക്ക് യൂണിറ്റ്, ട്രായ്യില്‍ നിന്നുള്ളവരാണെന്ന് അവകാശപ്പെടുന്ന വ്യാജ കോളര്‍മാര്‍ക്കെതിരെ പൗരന്മാര്‍ക്ക് മുന്നറിയിപ്പ് നല്‍കി. 

അസാധാരണ ഉപയോഗം കാരണം രണ്ട് മണിക്കൂറിനുള്ളില്‍ കണക്ഷന്‍ വിച്ഛേദിക്കപ്പെടുമെന്ന് അവകാശപ്പെടുന്ന നിരവധി കോളുകള്‍ ഉപയോക്താക്കള്‍ക്ക് ലഭിച്ചതായി പിഐബി ഫാക്ട്-ചെക്ക് പറഞ്ഞു. സേവന വിച്ഛേദവുമായി ബന്ധപ്പെട്ട് ട്രായ് ഉപഭോക്താക്കളെ നേരിട്ട് ബന്ധപ്പെടുന്നില്ലെന്ന് അറിയിപ്പില്‍ വ്യക്തമാക്കുന്നു. ബില്ലിംഗ്, കെവൈസി അല്ലെങ്കില്‍ ദുരുപയോഗം കാരണം ഏതെങ്കിലും മൊബൈല്‍ നമ്പര്‍ വിച്ഛേദിക്കുന്നത് അതത് ടെലികോം സേവന ദാതാവാണ്. 

ഇത്തരം തട്ടിപ്പുകളില്‍ വീഴരുതെന്നും അജ്ഞാത കോളര്‍മാരുമായി ഒരിക്കലും വ്യക്തിഗത അല്ലെങ്കില്‍ സാമ്പത്തിക വിവരങ്ങള്‍ പങ്കിടരുതെന്നും അറിയിപ്പില്‍ പറയുന്നു. കൂടാതെ അത്തരം സൈബര്‍ തട്ടിപ്പുകള്‍ cybercrime.gov.in എന്ന വിലാസത്തില്‍ റിപ്പോര്‍ട്ട് ചെയ്യാനും നിര്‍ദ്ദേശം നല്‍കി.