കൊവിഡ് ബാധിച്ച് മരിച്ച വയോധികന്റെ മൃതദേഹത്തിൽ എലി കടിച്ചു; പ്രതിഷേധവുമായി ബന്ധുക്കൾ

ഇന്‍ഡോര്‍: കൊവിഡ് ബാധിച്ച് മരിച്ച വയോധികന്റെ മൃതദേഹം എലി കടിച്ച നിലയിൽ. ഇൻഡോറിലെ യുണീക് ആശുപത്രിയിലാണ് സംഭവം. കൊവിഡ് ബാധിച്ച്‌ മരിച്ച 87കാരന്റെ മൃതദേഹത്തിൽ മുഖവും കാലുകളും വികൃതമായനിലയിലായിരുന്നു. ഇതോടെ മോർച്ചറിയിൽ സൂക്ഷിച്ചിരുന്ന മൃതദേഹത്തിൽ എലി കരണ്ടതാണെന്ന് ആരോപിച്ച് ബന്ധുക്കൾ രംഗത്തെത്തി. 

ആശുപത്രിയുടെ പുറത്ത് സ്ട്രെച്ചറില്‍ മൃതദേഹവുമായി ബന്ധുക്കൾ പ്രതിഷേധിച്ചു, ഇതിന്റെ ദൃശ്യങ്ങൾ സാമൂഹ്യ മാധ്യമങ്ങളിൽ പ്രചരിയ്ക്കുന്നുണ്ട്. ഇവരോട് പിരിഞ്ഞുപോകാൻ പൊലീസ് ആവശ്യപ്പെട്ടതോടെ പൊലീസും പ്രതിഷേധക്കാരും തമ്മിൽ തർക്കം ഉണ്ടായി. അതേസമയം ബന്ധുക്കളുടെ ആരോപണം ആശുപത്രി അധികൃതർ തള്ളി. സംഭവത്തില്‍ അന്വേഷണം ആരംഭിച്ചതായും കുറ്റക്കാർക്കെതിരെ നടപടിയെടുക്കും എന്നും ഇൻഡോർ കൊവിഡ് നോഡൽ ഓഫീസർ ഡോ എ മലാകൻ പറഞ്ഞു.