ജെറ്റ് എയർവേയ്സ് വിമാനം റൺവേയിൽ നിന്ന്​ തെന്നിമാറി; ഒഴിവായത് വന്‍ ദുരന്തം

ഗോവയിൽ വിമാനം റൺവേയിൽ നിന്ന്​ തെന്നിമാറി

ഗോവയിലെ ദബോളിം വിമാനത്താവളത്തിൽ വിമാനം റൺവേയിൽ നിന്ന്​ തെന്നിമാറി. പറന്നുയരാൻ ശ്രമിക്കുന്നതിനിടെയാണ് ജെറ്റ് എയർവേയ്സിന്റെ 9 ‍ഡബ്ല്യൂ 2374 എന്ന വിമാനം റൺവേയിൽ നിന്നു തെന്നി നീങ്ങിയത്

ഏഴ് ജീവനക്കാർ ഉൾപ്പെടെ 161 യാത്രക്കാരുമായി ഗോവയിൽ നിന്നു മുംബൈയിലേക്ക് പോകാനിരുന്ന വിമാനമാണ് അപകടത്തിൽപ്പെട്ടത്. ഉടൻ തന്നെ എല്ലാ യാത്രക്കാരെയും വിമാനത്തിൽ നിന്ന്​ മാറ്റിയതായി അധികൃതർ അറിയിച്ചു.

അതേസമയം, രക്ഷാപ്രവർത്തനത്തിനിടെ അഞ്ചു യാത്രക്കാർക്ക് നിസാര പരുക്ക് പറ്റിയെന്നും ജെറ്റ് എയർവേയ്സ് അധികൃതർ വ്യക്തമാക്കി. സംഭവത്തിന്​ ശേഷം വിമാനത്താവളം അടച്ചിരുന്നു. പിന്നീട്​ ഒരു മണിക്കുറിന്​ ശേഷമാണ്​ വിമാനത്താവളത്തി​ന്റെ പ്രവർത്തനം വീണ്ടും ആരംഭിച്ചത്.