കല്‍ക്കരി അഴിമതിയുമായി ബന്ധപ്പെട്ട കേസുകള്‍ അട്ടിമറിയ്ക്കുന്നതിനായി സി ബി ഐ ഉദ്യോഗസ്ഥര്‍ കൈക്കൂലി വാങ്ങിയതായി ആരോപണം
കല്‍ക്കരിപ്പാടം അഴിമതിക്കേസ് അട്ടിമറിക്കുന്നതിനായി അന്വേഷണ സംഘത്തിലുണ്ടായിരുന്ന ചില സി ബി ഐ ഉദ്യോഗസ്ഥര്‍ കൈക്കൂലി വാങ്ങിയതായി ആരോപണം
കല്‍ക്കരിപ്പാടം അഴിമതിക്കേസ് അട്ടിമറിക്കുന്നതിനായി അന്വേഷണ സംഘത്തിലുണ്ടായിരുന്ന ചില സി ബി ഐ ഉദ്യോഗസ്ഥര്‍ കൈക്കൂലി വാങ്ങിയതായി ആരോപണം. അന്വേഷണ സംഘത്തില്‍ ഉള്‍പ്പെട്ട ഒരു സി ബി ഐ ഉദ്യോഗസ്ഥന്‍ സി ബി ഐ ഡയറക്ടര്‍ക്ക് എഴുതിയ കത്തിലാണ് ഈ വെളിപ്പെടുത്തല്‍.
സത്യസന്ധനായ ഒരു ഓഫീസര്‍ എന്ന് ഒപ്പിട്ട് അയച്ച കത്ത് ഇന്ത്യന്‍ എക്‌സ്പ്രസ് പത്രമാണ് പുറത്ത് വിട്ടത്.
കല്‍ക്കരി അഴിമതിയുമായി ബന്ധപ്പെട്ട കേസുകള്‍ അട്ടിമറിക്കാനും ഒതുക്കിത്തീര്‍ക്കാനുമായി മേലുദ്യോഗസ്ഥര്‍ കോടികള്‍ കോഴ വാങ്ങുന്നുവെന്നാണ് കത്തില്‍ ആരോപിക്കുന്നത്. അന്വേഷണം അവസാനിപ്പിച്ചുവെന്ന് സുപ്രീം കോടതിയെ അറിയിച്ച ചില കേസുകള്‍ കൈക്കൂലി നല്‍കാത്തതിനെ തുടര്‍ന്ന് പുനരന്വേഷണം നടത്തുന്നതായും കത്തില്‍ വ്യക്തമാക്കുന്നു.
സി ബി ഐ ഡയറക്ടറുടെ പേരിലാണ് പണം വാങ്ങുന്നതെന്നും ചില ഉയര്‍ന്ന ഉദ്യോഗസ്ഥരാണ് ഇതിന്റെ പിന്നിലെന്നും കത്തില്‍ ആരോപിക്കുന്നു. മാര്‍ച്ച് അവസാന ആഴ്ചയിലാണ് സി ബി ഐ ഡയറക്ടര്‍ അനില്‍ സിന്‍ഹയ്ക്ക് കത്ത് അയച്ചിരിക്കുന്നത്. കല്‍ക്കരിപ്പാടം അഴിമതിക്കേസ് അന്വേഷണ സംഘത്തിലുള്ള ഉദ്യോഗസ്ഥന്‍ തന്നെയാണ് കത്തയച്ചതെന്ന് സ്ഥിരീകരിച്ചതായും ഇന്ത്യന്‍ എക്‌സ്പ്രസ് അവകാശപ്പെടുന്നു.
