വിവാഹവിരുന്നിന് മട്ടന്‍ കറി വിളമ്പാത്തതില്‍ പ്രതിഷേധിച്ച് വരന്‍ വധുവിനെ ഉപേക്ഷിച്ച് പന്തല്‍ വിട്ടിറങ്ങി. ഒഡിഷയിലെ സുകിന്ദയിലാണ് അപൂര്‍വ സംഭവം. വധുവിന്റെ വീട്ടുകാര്‍ നടത്തിയ വിരുന്നില്‍ മട്ടന്‍ കറി വിളമ്പാത്തതാണ് വരനെ ചൊടിപ്പിച്ചത്.
കിയോന്‍ജാര്‍ ജില്ലയിലെ റേബനാപാലസ്പാര്‍ സ്വദേശിയാണ് വരനായ രാമകാന്ത് പത്ര. ഇയാള്‍ക്ക് 27 വയസ്സാണ്. വധുവിന്റെ വീട്ടിലേക്ക് രാമകാന്ത് പത്രയും കുടുംബവും രാവിലെ എത്തി. എല്ലാ ആചാരങ്ങള്‍ക്കും ശേഷം വിവാഹപന്തലില്‍ വിരുന്നിനായി പന്തിയിലിരുത്തി. അപ്പോഴാണ് പ്രശ്‌നങ്ങളുടെ തുടക്കം.
ആദ്യം മട്ടന്‍ കറി വിളമ്പണമെന്ന് വരനും വരന്റെ വീട്ടുകാരും ആവശ്യപ്പെട്ടു. എന്നാല്‍, മട്ടന്‍ കറി തയ്യാറായിട്ടില്ല എന്നായിരുന്നു വധുവിന്റെ വീട്ടുകാര്‍ അറിയിച്ചത്. വിവാഹ വിരുന്നിന് വധുവിന്റെ വീട്ടുകാര്‍ മട്ടന്‍ കറി ഭക്ഷണ മെനുവില്‍ ഉള്‍പ്പെടുത്തിയിട്ടില്ലെന്ന് അറിഞ്ഞതോടെ വരനും വരന്റെ വീട്ടുകാരും പ്രശ്‌നമുണ്ടാക്കി. വിവാഹം നടക്കില്ലെന്നും തങ്ങള്‍ പോകുകയാണെന്നും വരന്റെ വീട്ടുകാര്‍ അറിഞ്ഞു. വധുവിന്റെ വീട്ടുകാര്‍ തടയാന്‍ ശ്രമിച്ചെങ്കിലും വരന്‍ വിവാഹത്തിനു തയ്യാറായില്ല.
സുകിന്ദയിലെ ബന്ധുവിന്റെ വീട്ടിലേക്ക് പോയ പത്ര ബുധനാഴ്ച രാത്രി തന്നെ അതേ ഗ്രാമത്തില്‍ നിന്ന് മറ്റൊരു യുവതിയെ വിവാഹം കഴിച്ചു. അതിന് ശേഷമാണ് കിയോന്‍ജാറിലെ വീട്ടിലേക്ക് മടങ്ങിയത്. സംഭവവുമായി ബന്ധപ്പെട്ട് വധുവിന്റെ വീട്ടുകാര്‍ ഇതുവരെ പരാതിയൊന്നും നല്‍കിയിട്ടില്ല.
