24 മണിക്കൂറിൽ 30 ലക്ഷം അംഗങ്ങൾ, രാഷ്ട്രീയത്തിലും അണ്ണൻ ദളപതി

നടന്‍ വിജയ് ആരംഭിച്ച രാഷ്ട്രീയ പാര്‍ട്ടിയായ തമിഴക വെട്രി കഴകത്തില്‍ അംഗമാകാന്‍ ആരാധകരുടെ ഒഴുക്ക്. അംഗത്വം ആരംഭിച്ച് 24 മണിക്കൂറിനുള്ളില്‍ 30 ലക്ഷം പേര്‍ പാര്‍ട്ടി അംഗത്വം എടുത്തതായി തമിഴക വെട്രി കഴകം അറിയിച്ചു. കഴിഞ്ഞമാസമാണ് വിജയ് പുതിയ രാഷ്ട്രീയപാര്‍ട്ടി പ്രഖ്യാപിച്ചത്. പ്രത്യേക മൊബൈല്‍ ആപ്പ് വഴി പാര്‍ട്ടി അംഗത്വമെടുക്കുന്നതിനുള്ള ക്യാമ്പയിന്‍ കഴിഞ്ഞ വെള്ളിയാഴ്ചയാണ് പാര്‍ട്ടി ആരംഭിച്ചത്.

പാര്‍ട്ടിയില്‍ അംഗത്വമെടുക്കാന്‍ വിജയ് ആവശ്യപ്പെട്ടതോടെ ആദ്യ മണിക്കൂറില്‍ തന്നെ 20 ലക്ഷത്തോളം പേര്‍ ആപ്പില്‍ കയറിയതിനെ തുടര്‍ന്ന് സൈറ്റിന്റെ പ്രവര്‍ത്തനം താത്കാലികമായി നിര്‍ത്തിവെച്ചിരുന്നു. തുടര്‍ച്ചയായി ആളുകള്‍ ഒടിപി നമ്പര്‍ ആവശ്യപ്പെട്ടതോടെയാണ് ആപ്പ് ക്രാഷായത്. തകര്‍ച്ച പരിഹരിച്ച് 24 മണിക്കൂറിനകം 30 ലക്ഷം പേരാണ് അംഗത്വമെടുത്തത്. 2 കോടി അംഗങ്ങളെ ചേര്‍ക്കാനാണ് പാര്‍ട്ടി ലക്ഷ്യമിടുന്നതെന്ന് പാര്‍ട്ടി ഭാരവാഹികള്‍ പറയുന്നു.