സ്‌കൂട്ടര്‍ യാത്രികയുടെ മുകളിലേക്ക് അണ്ണാ ഡിഎംകെയുടെ ബാനര്‍ വീണു; പിന്നാലെയെത്തിയ ടാങ്കർ ലോറിയിടിച്ച് യുവതിക്ക് ദാരുണാന്ത്യം

ചെന്നൈ പള്ളികരനായ് റോഡിലാണ് സംഭവം.

അണ്ണാ ഡിഎംകെ നേതാക്കളുടെ ചിത്രമുള്ള ബാനർ വീണ് സ്കൂട്ടറിൽ നിന്നും റോഡിലേക്ക് തെറിച്ചുവീണ യുവതി ടാങ്കർ ലോറിയിടിച്ച് മരിച്ചു. ചെന്നൈ പള്ളികരനായ് റോഡിലാണ് സംഭവം. ചെന്നൈ സ്വദേശിയായ സുഭശ്രീയുടെ മുകളിലേക്ക് റോഡിന്റെ സെന്റർ മീഡിയനിൽ സ്ഥാപിച്ച ബാനർ വീഴുകയായിരുന്നു. തുടർന്ന് നിയത്രണം വിട്ട സ്കൂട്ടറിൽ നിന്നും തെറിച്ചുവീണ യുവതിയുടെ ശരീരത്തിലൂടെ പിന്നാലെ വെള്ളവുമായെത്തിയ ടാങ്കർ ലോറി കയറുകയായിരുന്നു. അപകടസ്ഥലത്ത് തന്നെ യുവതി മരിച്ചു.

ബിടെക് ബിരുദധാരിയായ യുവതി ഐഇഎൽറ്റിഎസ് പരീക്ഷ കഴിഞ്ഞ് മടങ്ങുമ്പോഴായിരുന്നു അപകടം. സംഭവത്തിന് അരമണിക്കൂറിന് ശേഷം എ‌ഐ‌ഡിഎംകെ പ്രവർത്തകരെത്തി ബാനറുകൾ നീക്കം ചെയ്തു. മൃതദേഹം പോസ്റ്റ്‌മോർട്ടത്തിന് ശേഷം ബന്ധുക്കൾക്ക് വിട്ടു നൽകി. പൊലീസ് കേസ് രജിസ്റ്റർ ചെയ്ത ശേഷം അന്വേഷണം ആരംഭിച്ചു.