ഒന്നു കരയാതെ, തിരിഞ്ഞോടാതെ, വേദന സഹിച്ച് അവൾ നിന്നു കത്തി - കരളലിയിക്കുന്ന ചിത്രം

ഒന്നു കരയുകപോലും ചെയ്യാതെ ആ കൊച്ചുപെൺകുട്ടി നിന്നു കത്തി - കരളലിയിക്കുന്ന ചിത്രം

ഒന്ന് നിലവിളിക്കുകയോ ശരീരം കത്തുമ്പോൾ വേദന സഹിക്കവയ്യാതെ തിരിഞ്ഞോടുകയോ ചെയ്യാതെ ഒരു പരാതിയുമില്ലാതെ അഞ്ചു വയസ്സുമാത്രം പ്രായമുള്ള പെൺകുട്ടി നിന്നു കത്തുന്ന ചിത്രം സോഷ്യൽ മീഡിയകളിൽ വൈറലായിരിക്കുകയാണ്. 

തമിഴ്നാട്ടിലെ തിരുനെൽവേലിയിൽ ഇന്നലെയായിരുന്നു സംഭവം. കലക്ട്രേറ്റ് വളപ്പിൽ ഒരു കുടുംബത്തിലെ നാല് പേർ തീ കൊളുത്തി ആത്മഹത്യയ്ക്ക് ശ്രമിച്ചതിൽ മൂന്ന് പേർ മരിച്ചു. കാശിധർമം സ്വദേശികളായ സ്ത്രീയും രണ്ട് പെൺകുഞ്ഞുങ്ങളുമാണ് മരിച്ചത്. ഗുരുതരമായി പരിക്കേറ്റ അച്ഛനെ ആശുപത്രിയിൽ പ്രവേശിപ്പിച്ചിരിയ്ക്കുകയാണ്.

ഇവർ വട്ടിപ്പലിശക്കാർക്കെതിരെ പരാതി നൽകാൻ കലക്ട്രേറ്റിലെത്തിയതായിരുന്നു. പരാതികളുടെ ഹിയറിംഗ് തുടങ്ങുന്നതിന് തൊട്ട് മുൻപ് ഇവർ കൈയിൽ കരുതിയിരുന്ന മണ്ണെണ്ണ ദേഹത്തൊഴിച്ച് തീ കൊളുത്തുകയായിരുന്നു. തൊട്ടടുത്തുള്ളവർ മണ്ണ് വാരിയെറിഞ്ഞും മറ്റും രക്ഷിയ്ക്കാൻ നോക്കിയെങ്കിലും ഫലമുണ്ടായില്ല.

ഗ്രാമത്തിലെ വട്ടിപ്പലിശക്കാരിൽ നിന്ന് ഒന്നരലക്ഷം രൂപ കടം വാങ്ങിയ ഇവർ രണ്ട് ലക്ഷത്തി മുപ്പത്തിനാലായിരം രൂപ തിരിച്ചടച്ചതായി ബന്ധുക്കൾ പറയുന്നു. എന്നാൽ രണ്ട് ലക്ഷം കൂടി വേണമെന്നാവശ്യപ്പെട്ട് വട്ടിപ്പലിശക്കാർ ഭീഷണിപ്പെടുത്തിയിരുന്നു. ഇതിനെതിരെ പൊലീസിൽ പരാതി നൽകിയിട്ടും ഫലമുണ്ടാകാതിരുന്നതിനെത്തുടർന്നാണ് ഇവർ കലക്ട്രേറ്റിൽ പരാതി നൽകാനെത്തിയതെന്നാണ് റിപ്പോർട്ടുകൾ.