‘ആദ്യം കേരളത്തിലെ മലയാളികളുടെ സുരക്ഷ ഉറപ്പാക്കൂ, എന്നിട്ട് ഇങ്ങോട്ട് വാ’ ; പിണറായിയോട് ബിജെപി നേതാവ്
ഹരിയാനയിലെ മലയാളികളുടെ സുരക്ഷയില്‍ ആശങ്കയറിയിച്ച പിണറായിക്ക് രൂക്ഷ വിമര്‍ശനവുമായി ബിജെപി നേതാവ്
ഹരിയാനയിലെ കലാപത്തിന്റെ പശ്ചാത്തലത്തില്‍ മലയാളികളുടെ സുരക്ഷയില്‍ ആശങ്കയറിയിച്ച് പ്രധാനമന്ത്രി നരേന്ദ്രമോദിക്ക് കത്തയച്ച മുഖ്യമന്ത്രി പിണറായി വിജയനെതിരെ രൂക്ഷവിമര്‍ശനവുമായി ബിജെപി നേതാവ് തരുണ്‍ വിജയ്.
പിണറായി വിജയന്റേത് ‘കപട’ ആശങ്കയാണെന്നാണ് തരുണ്‍ വിജയ് പറഞ്ഞത്. സ്വന്തം സംസ്ഥാനത്ത് കേരളീയര്‍ ‘ഏറ്റവും അസുരക്ഷിതരായി’ കഴിയുകയാണെന്നു പറഞ്ഞായിരുന്നു ബിജെപി നേതാവ് മുഖ്യമന്ത്രിയ്‌ക്കെതിരെ രംഗത്തുവന്നത്.
‘ഹരിയാനയിലുള്ള കേരളീയരുടെ സുരക്ഷയില്‍ കപട ആശങ്ക കാണിച്ച പിണറായി ഈ ചോദ്യത്തിന് മറുപടി പറയണം. കേരളത്തില്‍ കേരളീയരുടെ സുരക്ഷയും അഭിമാനവും സംരക്ഷിക്കാന്‍ കഴിയുന്നുണ്ടോ? ഇന്ത്യയില്‍ മലയാളികള്‍ക്ക് സുരക്ഷിതത്വം ഏറ്റവും കുറഞ്ഞത് കേരളത്തില്‍ തന്നെയാണെന്നും അദ്ദേഹം പറഞ്ഞു.
