നാരായണീയം
സാന്ദ്രാനന്ദാവബോധാത്മകമകമനുപമിതം കാലദേശാവധിഭ്യാം
നിര്‍മ്മുക്തം നിത്യമുക്തം നിഗമശതസഹസ്രേണ നിര്‍ഭാസ്യമാനം
അസ്പഷ്ടം ദൃഷ്ടമാത്രേ പുനരുരുപുരുഷാര്‍ത്ഥാത്മകം ബ്രഹ്മതത്ത്വം
തത്താവദ് ഭാതി സാക്ഷാദ് ഗുരുപവനപുരേ ഹന്ത! ഭാഗ്യം ജനാനാം
അഗ്രേ പശ്യാമി തേജോ നിബിഡതരകളായാവലീലോഭനീയം
പീയൂഷാപ്ലാവിതോഹം തദനു തദുദരേ ദിവ്യകൈശോരവേഷം
താരുണ്യാരംഭരമ്യം പരമസുഖരസാസ്വാദരോമാഞ്ചിതാങ്‌ഗൈ-
രാവീതം നാരാദാദ്യവിലസദുപനിഷത് സുന്ദരീമണ്ഡലൈശ്ച.
നീലാഭം കുഞ്ചിതാഗ്രം ഘനമമലതരം സംയതം ചാരുഭങ്‌ഗ്യാ
രത്നോത്തംസാഭിരാമം വലയിതമുദയച്ചന്ദ്രകൈ: പിഞ്ചരജാലൈ:
മന്ദാരസ്രങ്‌നിവീതം തവ പൃഥുമബരീ ഭാരമാലോകയേഹം
സ്നിഗ്ദ്ധശ്വേതോര്‍ധ്വപുണ്ഡ്‌റാമപി ച സുലളിതാം ഫാലബാലേന്ദുവീഥീം.
ഹൃദ്യം പൂര്‍ണ്ണാനുകമ്പാര്‍ണ്ണവമൃദുലഹരീ ചഞ്ചലദ്‌ബ്രൂവില്വാസൈ-
രാനീലസ്നിഗ്ദ്ധപക്ഷ്മാവലിപരിലസിതം നേത്രയുഗ്മം വിഭോ! തേ
സാന്ദ്രച്ഛായം വിശാലാരുണകമലദലാകാരമാമുഗ്ദ്ധതാരം
കാരുണ്യാലോകലീലാശിശിരിതഭുവനം ക്ഷിപ്യതാം മയ്യനാഥേ.
ഉത്തുംഗോല്ലാസിനാസം ഹരിമണിമുകുരപ്രോല്ലസദ്‌ഗണ്ഡപാളീ-
വ്യാലോലത് കര്‍ണ്ണപാശാഞ്ചിതമകരമണീ കുണ്ഡലദ്വന്ദ്വദീപ്രം
ഉന്മീലദ്ദന്തപങ്‌ക്തിസ്ഫുരദരുണതരച്ഛായബിംബാധരാന്ത:
പ്രീതിപ്രസ്യന്ദിമന്ദസ്മിതമധുരതരം വക്ത്രമുദ്ഭാസതാം മേ.
ബാഹുദ്വന്ദ്വേന രത്നോജ്ജ്വലവലയഭൃതാ ശോണപാണിപ്രവാളേ-
നോപാത്താം വേണുനാളീം പ്രസൃതനഖമയൊഖാംഗുലീസംഗശാരാം
കൃത്വാ വക്ത്രാരവിന്ദേ സുമധുരവികസദ്രാഗമുദ്ഭാവ്യമാനൈ:
ശബ്ദബ്രഹ്മാമൃതൈസ്ത്വം ശിശിരിതഭുവനൈ: സിഞ്ച മേ കര്‍ണ്ണവീഥീം.
ഉത്സര്‍പ്പത് കൌസ്തുഭശ്രീതതിഭിരരുണിതം കോമളം കണ്ഠദേശം
വക്ഷ:ശ്രീവത്സരമ്യം തരളതരസമുദ്ദീപ്രഹാരപ്രതാനം
നാനാവര്‍ണ്ണപ്രസൂനാവലികിസലയിനീം വന്യമാലാം വിലോല-
ല്ലോലംബാം ലംബമാനാമുരസി തവ തഥാ ഭാവയേ രത്നമാലാം.
അങ്‌ഗേ പഞ്ചാങ്‌ഗരാഗൈരതിശയവികസത് സൌരഭാകൃഷ്ടലോകം
ലീനാനേകത്രിലോകീവിതതിമപി കൃശാം ബിഭുതം മധ്യവല്ലീം
ശക്രാശ്മന്യസ്തതപ്തോജ്ജ്വലകനകനിഭാം പീതചേലം ദധാനം
ധ്യായാമോ ദീപ്തരശ്മിസ്ഫുടമണിരശനാ കിങ്കിണീമണ്ഡിതം ത്വാം.
ഊരൂ ചാരൂ തവോരൂ ഘനമസൃണരുചൌ ചിത്തചോരൌ രമായാ
വിശ്വക്ഷോഭം വിശങ്ക്യ ധ്രുവമനിശമുഭൌ പീതചേലാവൃതാങ്‌ഗൌ
ആനമ്രാണാം പുരസ്താന്ന്യസനധൃതസമസ്താരത്ഥപാളീസമുദ്ഗ-
ച്ഛായാം ജാനുദ്വയം ച ക്രമപൃഥുലമനോജ്ഞേ ച ജങ്‌ഘേ നിഷേവേ.
മഞ്ജീരം മഞ്ജുനാദൈരിവ പദഭജനം ശ്രേയ ഇത്യാലപന്തം
പാദാഗ്രം ഭ്രാന്തിമജ്ജത്പ്രനതജനമനോമന്ദരോദ്ധാരകൂര്‍മം
ഉത്തുങ്‌ഗാതാമ്രരാജന്നഖരഹിമകര ജ്യോത്സ്നയാ ചാശ്രിതാനാം
സന്താപധ്വാന്തഹന്ത്രീം തതിമനുകലയേ മങ്‌ഗലാമങ്‌ഗുലീനാം.
യോഗീന്ദ്രാണാം ത്വദങ്‌ഗേഷ്വധികസുമധുരം മുക്തിഭാജാം നിവാസോ
ഭക്താനാം കാമവര്‍ഷദ്യുതരുകിസലയം നാഥ ! തേ പാദമൂലം
നിത്യം ചിത്തസ്ഥിതം മേ പവനപുരപതേ ! കൃഷ്ണ ! കാരുണ്യസിന്ധോ !
ഹൃത്വാ നിശ്ശേഷതാപാന്‍ പ്രദിശതു പരമാനന്ദസന്ദോഹലക്ഷ്മീം.
അജ്ഞാത്വാ തേ മഹത്ത്വം യദിഹ നിഗദിതം വിശ്വനാഥ ! ക്ഷമേഥാ :
സ്തോത്രം ചൈതത് സഹസ്രോത്തരമധികതരം ത്വത്പ്രസാദായ ഭൂയാത്
ദ്വേധാ നാരായണീയം ശ്രുതിഷു ച ജനുഷാ സ്തുത്യതാ വര്‍ണ്ണനേന
സ്ഫീതം ലീലാവതാരൈരിദമിഹ കുരുതാമായുരാരോഗ്യസൌഖ്യം.
**********
