എല്ലാത്തരം ജനവിഭാഗങ്ങള്‍ക്കും ആഘോഷങ്ങളുണ്ട്, വ്യത്യസത സംഭവങ്ങളേയും സാഹചര്യങ്ങളേയും അവ അനുസ്മരിപ്പിക്കുന്നു.
മുസ്ളീം സമുദായത്തിന് പ്രത്യേകം നിശ്ഛയിച്ച രണ്ടാഘോഷവേളകളാണ് വലിയ പെരുന്നാളും ചെറിയ പെരുന്നാളും.
ഇസ്ളാമിന്‍റെ പഞ്ച സ്തംഭങ്ങളില്‍ നാലിനേയും, അഞ്ചിനേയും ബന്ധപ്പെറ്റുത്തിയാണ് രണ്ടു പെരുന്നാളുകളും ആഘോഷിക്കുന്നത്. തികച്ചും വ്യത്യസ്തമായ രണ്ട് സാഹചര്യങ്ങളെയും സന്ദര്‍ഭങ്ങളെയും ഓര്‍മ്മിച്ചുള്ളതാണ് ഈ പെരുന്നാളുകള്‍.
ഒരുമാസത്തെ വ്രതാനുഷ്ഠാനത്തിനു ശേഷമുള്ള ഒരു ദിവസത്തെമാത്രം ആഘോഷം ആയതുകൊണ്ടാണ് ഈദുല്‍ഫിത്തറിനെ ചെറിയ പെരുന്നാള്‍ എന്നു വിളിക്കുന്നത്.
ഈദുല്‍ അധയ്ക്ക് നാല് ദിവസത്തെ ആഘോഷമുള്ളതുകൊണ്ട് അതിനെ വലിയ പെരുന്നാള്‍ എന്നും മലയാളി മുസ്ളീങ്ങള്‍ വിളിച്ചുവരുന്നു.
വിശുദ്ധ ഇസ്ളാമിന്‍റെ പഞ്ചസ്തംഭങ്ങളിലെ നാലാമത്തേതായ റംസാന്‍ വൃതത്തിന് സമാപ്തി കുറിച്ചുകൊണ്ട് ചെറിയ പെരുന്നാളും, അഞ്ചാമത്തേതായ ഹജ്ജ് വേളയോട് ബന്ധപ്പെട്ട് ബലിപ്പെരുന്നാളും മുസ്ളിംങ്ങള്‍ ആഘോഷിക്കുന്നു.
മതം മനുഷ്യരെ നല്ലവരാക്കാനുള്ളതാണ്. മറ്റുള്ളവരുടെ സുഖത്തിനായി സ്വന്തം സുഖങ്ങള്‍ ബലികഴിച്ചും ജീവിക്കാന്‍ അതു മനുഷ്യനെ പ്രേരിപ്പിക്കുന്നു.
മതത്തിന്‍റെ ചട്ടങ്ങള്‍ക്കനുസരിച്ചു ജീവിക്കാന്‍ ആത്മനിയന്ത്രണം അനിവാര്യമാണ്. ഇതിനുള്ള പരിശീലനമെന്നോണമാണ് മുസ്ലിംകള്‍ നോമ്പനുഷ്ഠിക്കുന്നത്. . പ്രഭാതം മുതല്‍ സൂര്യാസ്തമനം വരെ ഭക്ഷണപാനിയങ്ങള്‍ വര്‍ജ്ജിക്കുന്നത് നോമ്പിന്‍റെ പ്രകടമായ രൂപമാണ്.
എതാണ്ടെല്ലാ സമൂഹങ്ങളും ഏതെങ്കിലും തരത്തില്‍ നോമ്പനുഷ്ഠിച്ചി രുന്നു.
മുസ്ലിംകള്‍ക്ക് റംസാന്‍ എന്ന ചന്ദ്രമാസക്കാലം മുഴുവന്‍ നോമ്പു കാലമാണ്.
ഇതിനുള്ള കല്‍പന ഖുര്‍ആനില്‍ നല്‍കിയതിന്‍റെ ആദ്യ ഭാഗം ഇങ്ങനെയാണ്. ''നോമ്പ്, മുമ്പുള്ള ജനങ്ങള്‍ക്ക് നിര്‍ബന്ധ മാക്കി യിട്ടുള്ളതുപോലെ, നിങ്ങള്‍ക്കും നിര്‍ബന്ധ മാക്കിയിരിക്കുന്നു.(2:183).
അച്ചടക്കവും അനുസരണശീലവും ലാളിത്യവും വ്രതാനുഷ്ഠാനത്തി ലൂടെ വിശ്വാസികള്‍ക്കു പ്രാപ്യമായി വരികയാണ്. വ്രതാനുഷ്ഠാനം മതാനുഷ്ഠാനത്തെ എളുപ്പവും സമ്പൂര്‍ണ്ണവുമാക്കാന്‍ സഹായിക്കുന്നു.
മതാനുഷ്ഠാനമാകട്ടെ, മനുഷ്യനെ മനസ്സമാധാനവും സന്തുഷ്ടിയും വിശ്വാസങ്ങള്‍ക്കൊപ്പം പുലരാന്‍ സഹായിക്കുന്നു. ഇസ്ളാമാകുന്ന വന്‍സൗധത്തിന്‍റെ പഞ്ചസ്തംഭങ്ങളില്‍ ഒന്നാണ് റമസാന്‍ മാസത്തി ലെ വ്രതാനുഷ്ഠാനം.
പെരുന്നാള്‍ ദിവസത്തിലുള്ള ഇബാദത്തുകള്‍ക്ക് പ്രത്യേക കൂലിറബ്ബ് വാഗാനം ചെയ്തിട്ടുണ്ട്. ആ ദിവസത്തിലുള്ള പ്രാര്‍ത്ഥനയ്ക്ക് ഇജാബത് ഉറപ്പാണ്.
അഞ്ച് സമയത്തുള്ള ദുആയെ അല്ലാഹു തട്ടുകയില്ല: 1- വെള്ളിയാഴ്ച ദിവസം, 2- മുഹറം പത്തില്‍ , 3- ശഅബാല്‍ പകുതിയിലെ രാത്രികളില്‍, 4-5- രണ്ട് പെരുന്നാള്‍ ദിവസങ്ങളില്‍. എന്ന നബിവചനം ഓര്‍ക്കുക.
ഈ ദിവസങ്ങളില്‍ അല്ലാഹുവിലേക്ക് തൗബ ചെയ്തുകൊണ്ടും മറ്റു സല്‍കര്‍മ്മങ്ങള്‍ ചെയ്തുകൊണ്ടും അനുഭവം ധന്യമാക്കുകയാണ്‍ വേണ്ടത്..
പെരുന്നാളിന് ഇനി ദിവസങ്ങള്‍ മാത്രമേ ബാക്കിയുള്ളൂ. ഒക്റ്റോബര്‍ 23 നൊ 24 നോ റംസാന്‍ പിറ കാണും.പെരുന്നാള്‍ ദിവസം ആഘോഷിക്കാനുള്ളതാണ്. പക്ഷേ, ആര്‍ഭാടമാകരുത്.
പെരുന്നാള്‍ നിസ്കാരം വളരെ പുണ്യവും പ്രധാനവുമാണ്. വൃദ്ധന്മാര്‍, കുട്ടികള്‍, സ്ത്രീകള്‍ എല്ലാവര്‍ക്കും നിസ്കാരമാകാം. കുടുംബങ്ങളിലും അയല്‍പക്കങ്ങളിലും ഒരു സൗഹൃദസന്ദര്‍ശനം നാം നടത്തിയിരിക്കണം.
പെരുന്നാള്‍ മനസ്സുകള്‍ക്ക് നന്മ പകരുന്നു. സൗഹൃദവും സന്തോഷവും പകരുന്നു . നമ്മുടെ കര്‍മ്മങ്ങള്‍ പെരുന്നാളിന്‍റെയും നോമ്പിന്‍റെയും പുണ്യങ്ങള്‍ കളഞ്ഞുകുളിക്കാന്‍ ഇടവരുത്തരുത്.
