ഫ്രഞ്ച് പ്രസിഡന്റ് നിക്കോളസ് സര്ക്കോസിയും ഭാര്യ കാര്ലാ ബ്രൂണിയും തമ്മിലുള്ള പ്രണയരംഗങ്ങള് ഇന്റര്നെറ്റിലെ ചൂടന് ഐറ്റമാകുന്നു. ഒരു അഭിമുഖത്തിനിടെ ഇരുവരും ചുംബനമുള്പ്പെടെയുള്ള പ്രണയലീലകളില് ഏര്പ്പെടുന്ന ദൃശ്യങ്ങളാണ് ഇന്റര്നെറ്റില് പ്രചരിക്കുന്നത്.
ദൃശ്യങ്ങള് പ്രത്യക്ഷപ്പെട്ട് മണിക്കൂറുകള്ക്കുള്ളില് തന്നെ ഇന്റര്നെറ്റില് ഇതിനായി പരതിയവര് ലക്ഷങ്ങളാണ്. ഫെമ്മി അച്വല്ലെ എന്ന മാഗസിന്റെ അഞ്ച് വായനക്കാര്ക്ക് തന്നെ ഇന്റര്വ്യൂ ചെയ്യാന് പ്രഥമ പൌരയായ ബ്രൂണി അനുവാദം നല്കിയിരുന്നു.
ഈ അഭിമുഖത്തിനിടെയാണ് നാടകീയമായി സര്ക്കോസിയുടെ രംഗപ്രവേശം. തന്നെ കണ്ട് എഴുന്നേറ്റ അതിഥികളോട് ഇരിക്കാന് പറഞ്ഞ സര്ക്കോസി വാചാലമായി സംസാരം തുടങ്ങുന്നു. സംഭാഷണത്തിന്റെ തുടക്കത്തില് ഭാര്യയുടെ അടുത്തേക്ക് മുഖമടുപ്പിക്കുന്ന സര്ക്കോസിക്ക് ഒരു ചൂടന് ചുംബനമാണ് ബ്രൂണി കൈമാറുന്നത്.
തുടര്ന്ന് തന്റെ സമീപം ഇരിപ്പുറപ്പിക്കുന്ന സര്ക്കോസിയുടെ കയ്യും നടുവും തിരുമ്മുന്ന (സ്വാഭാവികമെന്ന വ്യാജേന) ബ്രൂണിയെയാണ് ദൃശ്യത്തില് കാണുന്നത്. സര്ക്കോസിയുടെ മുഖത്തെ വിയര്പ്പും ബ്രൂണി ഒപ്പിക്കൊടുക്കുന്നുണ്ട്. ഇതാദ്യമായാണ് ഫ്രാന്സ് പ്രസിഡന്റിന്റെയും ഭാര്യയുടെയും ഇത്തരം നിമിഷങ്ങള് ദൃശ്യങ്ങളായി പുറത്തു വരുന്നത്.
പ്രണയഭാഷ കലര്ന്ന സംഭാഷണങ്ങളാണ് ഇതിനിടയില് ഇരുവരും നടത്തുന്നതും. ഇതും വെബ്സൈറ്റുകളില് ശ്രവിക്കാം. മിനുട്ടുകള്ക്ക് ശേഷം അരങ്ങില് നിന്ന് സര്ക്കോസി പിന്വാങ്ങുകയും ചെയ്യുന്നു.
അതിഥികള് ഏറെ കൌതുകത്തോടെ സര്ക്കോസിയുടെയും ബ്രൂണിയുടെയും വളര്ത്തുനായകളായ ക്ലാരയെയും ഡംബ്ലെഡോറിനെയും ടൌമിയെയും താലോലിക്കുന്നതും ദൃശ്യത്തിന്റെ ഭാഗമാണ്.
2008ലാണ് 54കാരനായ സര്ക്കോസിയുടെ ഭാര്യയായി ബ്രൂണി എല്സീ പാലസിലെത്തുന്നത്. വിവാഹിതരാകുന്നതിന് മുമ്പും ഇരുവരുടെയും ചുറ്റിക്കറക്കം മാധ്യമങ്ങളുടെ ഇഷ്ടവിഷയമായിരുന്നു.
ഏറെ നാള് നീണ്ടു നിന്ന പ്രണയത്തിനൊടുവിലാണ് നടിയും ഗായികയുമായിരുന്ന ബ്രൂണിയെ സര്ക്കോസി വിവാഹം ചെയ്യുന്നത്. സര്ക്കോസിയുടെ മൂന്നാം വിവാഹമായിരുന്നു ഇത്. 1982 സെപ്തംബറില് മാരീ ഡൊംമ്നിക്കി കുളിയോലി എന്ന സ്ത്രീയുമായിട്ടായിരുന്നു സര്ക്കോസിയുടെ ആദ്യവിവാഹം. 96ല് ഈ ബന്ധം വേര്പെടുത്തിയ സര്ക്കോസി അതേവര്ഷം ഒക്ടോബറില് ഫാഷന് മോഡല് ആയിരുന്ന സേസിലിയയെ വിവാഹം കഴിച്ചു.
പിന്നീട് സേസിലിയയുമായുള്ള ബന്ധവും വഷളായിത്തുടങ്ങി. 2007ലാണ് ഇരുവരും ഔപചാരികമായി വിവാഹം വേര്പെടുത്തുന്നത്. ഇതിന് ഒരു മാസത്തിന് ശേഷമായിരുന്നു സര്ക്കോസി ബ്രൂണിയുമായുള്ള ബന്ധം ആരംഭിച്ചത്. തന്റെ ഗ്ലാമര്ഭാര്യ തന്റെ നയങ്ങളെ സ്വാധീനിക്കുന്നുണ്ടെന്ന് വരെ അടുത്തിടെ സര്ക്കോസി പരസ്യമായി അഭിപ്രായപ്പെട്ടിരുന്നു.