പുലിമുരുകന്‍റെ ലഹരിയില്‍ അടുത്ത ബ്രഹ്‌മാണ്ഡ പടത്തിന് ടോമിച്ചൻ മുളകുപാടം; ദിലീപ് നായകൻ, തമിഴിൽ നിന്നും മറ്റൊരു സൂപ്പർ താരവും!

ദിലീപിന്റെ പൊളിറ്റിക്കൽ ത്രില്ലർ ഉടൻ!

നവാഗതനായ അരുൺ ഗോപി സംവിധാനം ചെയ്യുന്ന ചിത്രത്തിൽ ദിലീപ് നായകനാകുന്നു. മുളകുപാടം ഫിലിംസിന്റെ ബാനറിൽ ടോമിച്ചൻ മുളകുപാടം ആണ് നിർമാണം. പുലിമുരുകന് ശേഷം ടോമിച്ചൻ നിർമിക്കുന്ന സിനിമ കൂടിയാണ്. പുലിമുരുകന്റെ വമ്പൻ വിജയത്തിന് ശേഷം ടോമിച്ചൻ നടൻ ദിലീപുമായി ഒന്നിക്കുന്നു എന്നത് നേരത്തേ വാർത്തയായിരുന്നു. ചിത്രത്തിന്റെ പൂജ കൊച്ചിയിൽ നടന്നു. 

രാമലീല എന്ന് പേരിട്ടിരിക്കുന്ന ചിത്രം പക്ക പോളിറ്റിക്കൽ ത്രില്ലറായിരിക്കും. തിരക്കഥാകൃത്തുക്കളായ സച്ചി സേതുവിലെ സച്ചി ആണ് ഈ ചിത്രത്തിന് തിരക്കഥ ഒരുക്കുന്നത്. അനാർക്കലിക്ക് ശേഷം സച്ചി തിരക്കഥ എഴുതുന്ന ചിത്രം കൂടിയാണിത്. ജോഷി സംവിധാനം ചെയ്ത ലയണ്‍ എന്ന ചിത്രത്തിന് ശേഷം ദിലീപ് വീണ്ടും രാഷ്ട്രീയക്കാരന്റെ വേഷത്തില്‍ എത്തുന്ന ചിത്രം കൂടിയാണിത്. 

മലയാളത്തിലും തമിഴിലും ശ്രദ്ധേയയായ നടി രാധിക ശരത്കുമാർ ഒരു നീണ്ട ഇടവേളയ്ക്ക് ശേഷം തിരിച്ചെത്തുന്ന സിനിമ കൂടിയാണിത്. 23 വര്‍ഷങ്ങള്‍ക്ക് ശേഷം സിനിമയിലേക്ക് തിരിച്ചെത്തുന്ന രാധിക ശരത് കുമാര്‍ ദിലീപിന്റെ അമ്മ വേഷത്തിലാണ് എത്തുന്നത്. പ്രയാഗ മാർട്ടിൻ ആണ് ചിത്രത്തിൽ നായിക. ദിലീപ് നായന്നാകുന്ന കെ ബിജു സംവിധാനം ചെയ്യുന്ന ജോര്‍ജേട്ടന്‍സ് പൂരം എന്ന ചിത്രത്തിന്റെ ഷൂട്ടിങ് പൂര്‍ത്തിയായി പോസ്റ്റ്-പ്രൊഡക്ഷന്‍ വര്‍ക്കിലേക്ക് കടന്നിരിക്കുകയാണ്.