മാരുതി സുസൂക്കിയുടെ ആദ്യ ഇലക്ട്രിക് വാഹനം 'എക്സ്എൽ‌5', 2021ൽ വിപണിയിലേയ്ക്ക്

മുംബൈ: മാരുതി സുസൂക്കി ആദ്യം ഇന്ത്യൻ വിപണിയിൽ അവതരിപ്പിയ്ക്കുന്ന ഇലക്ട്രിക് വാഹനത്തിന്റെ പേര് എസ്ക്എൽ 5 ആയിരിയ്ക്കുമെന്ന് റിപ്പോർട്ടുകൾ. മാരുതിയുടെ ടോൽബോയ് ഹാച്ച്ബാക്ക് വാഗൺ ആറിനെ അടിസ്ഥാനപ്പെടുത്തിയായിരിയ്ക്കും ഈ വാഹനം ഒരുങ്ങുക, ആദ്യ ഇലക്ട്രിക് വാഹനം 2021ൽ മാരുതി സുസൂക്കി വിപണിയിൽ അവതരിപ്പിയ്ക്കും എന്നാണ് റിപ്പോർട്ടുകൾ. മാരുതിയുടെ പ്രീമിയം ഡീലര്‍ഷിപ്പായ നെക്‌സയിലൂടെയായിരിക്കും വിൽപ്പന.

ഒറ്റചാർജിൽ 200 കിലോമീറ്റർ ദൂരം സഞ്ചരിയ്ക്കാൻ സധിയ്ക്കുന്നതായിരിയ്ക്കും മാരുതി സുസൂക്കിയുടെ ഇലക്ട്രിക് വാഹനം. പുതുതലമുറ വാഗണ്‍ ആറിനും സുസുക്കി സോളിയോയ്‌ക്കും സമാനമായി ടാള്‍ബോയ് ഡിസൈനിലാണ് എക്സ്എൽ 5 എത്തുക. എന്നാൽ വാഹനം കാഴ്ചയിൽ വാഗൺ ആറിൽനിന്നും തീർത്തും വ്യത്യസ്തമായിരിയ്ക്കും. മെലിഞ്ഞ ഗ്രില്ലും, സ്പ്ലിറ്റ് ഹെഡ്‌ലാംപുകളുമാണ് വാഹനത്തിന്റെ മുന്നിൽ പ്രധാനമായും പ്രതീക്ഷിയ്ക്കുന്ന മാറ്റം. 

ഇടതുവശത്ത് മുന്നിലേയും പിന്നിലേയും ചക്രങ്ങള്‍ക്ക് മുകളിലായി രണ്ട് ചാര്‍ജിങ് പോയിന്റുകള്‍ വാഹനത്തിലുണ്ടാകും. ഇഗ്നിസിൽ ഉപയോഗിക്കുന്ന 15 ഇഞ്ച് അലോയ് വീലുകളിലാണ് എക്‌സ്‌എല്‍ 5ൽ വരുന്നത്. കാബിന്‍ രൂപകല്‍പ്പന വാഗണ്‍ആര്‍ ഹാച്ച്‌ബാക്കിന് സമാനമായിരിയ്ക്കും. സുസുക്കിയുടെ 7.0 ഇഞ്ച് 'സ്മാര്‍ട്ട്‌പ്ലേ' ടച്ച്‌സ്‌ക്രീന്‍ ഇന്‍ഫൊടെയ്ന്‍മെന്റ് സിസ്റ്റം, ഓട്ടോമാറ്റിക് ക്ലൈമറ്റ് കണ്‍ട്രോള്‍ എന്നിവ ഇന്റീരിയറിൽ പ്രതീക്ഷിയ്ക്കുന്നവയാണ്. സ്റ്റാന്‍ഡേര്‍ഡ്, ഡിസി ഫാസ്റ്റ് ചാര്‍ജിങ്ങ് സംവിധാനങ്ങള്‍ ലഭ്യമായിരിയ്ക്കും. സ്റ്റാന്റേഡ് ചാര്‍ജര്‍ ഉപയോഗിച്ച്‌ ഏഴ് മണിക്കൂറില്‍ ബാറ്ററി പൂര്‍ണമായും ചാര്‍ജ് ചെയ്യാം.