മൂന്നാഴ്ചകൾകൊണ്ട് 2,000 ബുക്കിങ് സ്വന്തമാക്കി എംജി ഗ്ലോസ്റ്റർ !

മൂന്നാഴ്ചകൾകൊണ്ട് 2,000 ബുക്കിങ് സ്വന്തമാക്കി എംജിയുടെ ഫുൾസൈസ് എസ്‌യുവി ഗ്ലോസ്റ്റർ. ഉത്സവ സീസണിന് മുന്നോടിയായി വാഹനത്തെ വിപണിയിൽ എത്തിച്ചതാണ് ഈ നേട്ടം കൈവരിയ്ക്കാൻ കാരണം എന്ന് എംജി വ്യക്തതമാക്കി. 29.98 ലക്ഷമാണ് വാഹനത്തിന്റെ പ്രാരംഭ പതിപ്പിന്റ് എക്സ് ഷോറൂം വില. ഒരു ലക്ഷം രൂപ മുൻ‌കൂറായി നൽകി വാഹനം ബുക്ക് ചെയ്യാവുന്നതാണ്. 2+2+2-6 സീറ്റർ, 2+3+2-7 സീറ്റർ പതിപ്പുകളിൽ ലഭ്യമാകും. സെഗ്‌മെന്റിൽ തന്നെ മറ്റാരും നൽകാത്ത അധ്യാധുനിക സാങ്കേതിക വിദ്യയോടെയാണ് ഗ്ലോസ്റ്റർ വിപണിയിലെത്തുന്നത്. 

ഇന്റലിജന്റ് 4 വീൽഡ്രൈവ്, അഡാപ്റ്റീവ് ക്രുയിസ് കൺട്രോൾ, ഓട്ടോണൊമസ് പാർക്കിങ് എന്നിങ്ങനെ അത്യാധുനിക ഫീച്ചറുകളുമായാണ് വാഹനം വിപണിയിൽ എത്തുന്നത്. ഇത് വ്യക്തമാക്കുന്ന ടീസറുകൾ എംജി പുറത്തുവിട്ടിരുന്നു. ടെറെയ്നുകൾക്കനുസരിച്ച് വാഹനത്തെ പ്രത്യേകം നിയന്ത്രിയ്ക്കാവുന്ന സംവിധാനമാണ് ഇന്റലിജന്റ് 4 വീൽഡ്രൈവ്. ആക്സിലറേറ്റിങും ബ്രേക്കിങ്ങും ഉൾപ്പടെ സെൻസറുകളൊടെ സഹയത്തോടെ വാഹനം തനിയെ നിർവഹിയ്ക്കുന്ന സംവിധാനമാണ് അഡാപ്റ്റീവ് ക്രുയിസ് കൺട്രോൾ. 

മുന്നിലും പിന്നിലുമുള്ള വാഹങ്ങളും വസ്ഥുക്കളുമായുള്ള അകലം തിരിച്ചറിഞ്ഞ് വാഹനം സ്വയം നിയന്ത്രിയ്ക്കും. അതായത് ആക്സിലറേറ്ററിലും ബ്രേക്കിലും കാൽ വയ്ക്കേണ്ട ആവശ്യമില്ല ആ ജോലി വാഹനം തനിയെ ചെയ്തോളും. ഡ്രൈവർ സ്റ്റിയറിങ് നിയന്ത്രിച്ചാൽ മാത്രം മതിയാകും. സുരക്ഷിതമായ ഡ്രൈവ് ഉറപ്പുവരുത്തുന്നതിനുള്ള അഡ്വാന്‍സ്ഡ് ഡ്രൈവര്‍ അസിസ്റ്റന്‍സ് സിസ്റ്റം വാഹനത്തിൽ സജ്ജികരിച്ചിട്ടുണ്ട്. അപകടം ഉണ്ടാകാനുള്ള സാഹചര്യങ്ങളെ മുൻകൂട്ടി തിരിച്ചറിഞ്ഞ് ഇത് ഒഴിവാക്കാൻ സഹായിയ്ക്കുന്ന സംവിധാനമാണ് എഡിഎഎസ്.  

ഇന്റീരിയറിൽ 12.3 ഇഞ്ച് ഇൻഫോടെയിൻമെന്റ് സിസ്റ്റം ഉൾപ്പടെയുള്ള പ്രീമിയം സംവിധാനങ്ങൾ ഒരുക്കിയിരിയ്ക്കുന്നു. 224 എച്ച് പി കരുത്ത് ഉത്പാദിപ്പിയ്ക്കാൻ ശേഷിയുള്ള 2.0 ലിറ്റർ ടർബോ ചാർജ്ഡ് പെട്രോൾ, 2.0 ലിറ്റർ ട്വിൻ ടർബോ ഡീസൽ എഞ്ചിനികളിലാണ് വാഹനം വിപണിയിൽ എത്തിയിരിയ്ക്കുന്നത്.