ലംബോർഗിനി വാങ്ങണം, അമ്മയോട് പിണങ്ങി മൂന്ന് ഡോളറുമായി കാറിൽ പുറപ്പെട്ട് 5 വയസുകാരൻ !

ലംബോർഗിനി കാർ വാങ്ങാൻ മൂന്ന് ഡോളറുമായി കാറിൽ പുറപ്പെട്ട അഞ്ച് വയസുകാരനെ കുറിച്ചുള്ള വാർത്ത തരംഗമായി മാറിയിരിയ്ക്കുകയാണ്. അമേരിയ്ക്കയിലെ യൂട്ടയിലാണ് സംഭവം. ഇഷ്ട വാഹനമായ ലംബോർഗിനി വാങ്ങി തരണമെന്ന് കുട്ടി ആവശ്യപ്പെട്ടു എന്നാൽ അമ്മ ഇതിന് സമ്മതിച്ചില്ല. ഇതോടെ മാതാപിതാക്കൾ വീട്ടിലില്ലാത്ത തക്കം നോക്കി കയ്യിയുള്ള മൂന്ന് ഡോളറുമെടുത്ത് ലെംബോർഗിനി വാങ്ങാൻ കാലിഫോർണിയയിലേയ്ക്ക് അഞ്ചുവയസുകാരൻ കാറിൽ ഇറങ്ങി പുറപ്പെടുകയായിരുന്നു.

വഴിയിൽ യൂട്ട പൊലീസ് കൈ കാണിച്ചതോടെ കൂസലൊന്നുമില്ലാതെ കുട്ടി വണ്ടി സൈഡ് ആക്കി, ഡ്രൈവർ സീറ്റിലെ ആളുടെ പ്രായം കേട്ടതോടെ പൊലീസും ഞെട്ടി. പൊലീസിനോട് കാര്യങ്ങൾ എല്ലാം കുട്ടി വിശദീകരിയ്ക്കുകയും ചെയ്തു. ഇതോടെ കുട്ടിയെ പൊലിസ് വീട്ടിലെത്തിയ്ക്കുകയായിരുന്നു. കുട്ടിക്കെതിരെ കേസൊന്നും രജിസ്റ്റർ ചെയ്തിട്ടില്ല. എന്നാൽ മാതാപിതാക്കൾക്കെതൊരെ കേസെടുക്കുന്ന കാര്യത്തിൽ കോടതി തീരുമാനമെടുക്കുമെന്ന് പൊലീസ് വ്യക്തമാക്കി.