‘പേടിക്കണ്ട, മനസ്സ് മടുക്കുകയും ചെയ്യരുത്, എല്ലാവരും കൂടെയുണ്ട്’- ദുരിത ബാധിതർക്ക് മമ്മൂട്ടിയുടെ കരുതൽ

ദുരിത ബാധിതർക്ക് മമ്മൂട്ടിയുടെ കരുതൽ

കനത്ത മഴയെ തുടർന്നുണ്ടായ പ്രളയ ബാധിത പ്രദേശത്ത് സന്ദർശനം നടത്തി നടൻ മമ്മൂട്ടി. എറണാകുളം ജില്ലയിലെ പറവൂര്‍ പുത്തന്‍വേലിക്കര തേലത്തുരുത്തില്‍ ആരംഭിച്ച ദുരിതാശ്വാസ കേന്ദ്രമായ കേരള ഓഡിറ്റോറിയത്തിലെത്തിയാണ് മമ്മൂട്ടി സഹായം വാഗ്ദാനം ചെയ്തത്. നേരിട്ടെത്തിയായിരുന്നു മമ്മൂട്ടി തന്റെ കരുതൽ അറിയിച്ചത്.

എല്ലാവരും ഒറ്റ കെട്ടായി ദുരിതം അനുഭവിക്കുന്നവരെ സഹായിക്കുന്നതിന് ആവശ്യമായ നടപടി സ്വീകരിക്കണമെന്ന് മമ്മൂട്ടി പറഞ്ഞു. പേടിക്കണ്ട, മനസ്സ് മടുക്കരുത്. കുറച്ച് ദിവസത്തേക്ക് മാത്രമാണിത്. വീട്ടിലേക്ക് തിരികെ പോകാനാകുമ്പോഴും അതുവരേയും എല്ലാവരും കൂടെയുണ്ടാകും. നല്ലവരായ കുറേ മനുഷ്യർ സഹായങ്ങൾ നൽകുന്നുണ്ട്. എല്ലാവരും കൂടെയുണ്ട്’- മമ്മൂട്ടി പറഞ്ഞു.

ദുരിത ബാധിതര്‍ക്ക് ആവശ്യമായ സഹായം അധികൃതരോട് ആലോചിച്ച ശേഷം എത്തിക്കാമെന്ന് മമ്മൂട്ടി ഉറപ്പു നല്‍കി. മമ്മൂട്ടിക്ക് പുറമെ വി ഡി സതീശന്‍ എംഎല്‍എയും ക്യാമ്പില്‍ സന്ദര്‍ശനം നടത്തി. 350 ഓളം കുടുംബങ്ങളാണ് ഇവിടെ ക്യാമ്പില്‍ താമസിക്കുന്നത്.

അതേസമയം, വയനാട്, ഇടുക്കി, ആലപ്പുഴ, കോട്ടയം, എറണാകുളം, പാലക്കാട്, മലപ്പുറം, കോഴിക്കോട് എന്നി ജില്ലകളില്‍ റെഡ് അലര്‍ട്ട് പ്രഖ്യാപിച്ചിരിക്കുകയാണ്. വയനാട് ജില്ലയില്‍ ഓഗസ്റ്റ് 14 വരെയും ഇടുക്കിയില്‍ ഓഗസ്റ്റ് 13 വരെയും മറ്റ് ജില്ലകളില്‍ ഓഗസ്റ്റ് 11 വരെയുമാണ് റെഡ് അലര്‍ട്ട് പ്രഖ്യാപിച്ചിരിക്കുന്നത്.