ദിലീപേട്ടന് നല്ലത് മാത്രം വരണേ എന്ന് പ്രാർത്ഥിക്കുന്നു: പ്രയാഗ മാർട്ടിൻ

ആ സമയത്ത് ദിലീപേട്ടന് വേണ്ടി പ്രാർത്ഥിച്ചു: പ്രയാഗ മാർട്ടിൻ

നടൻ ദിലീപിന് തന്റെ ജീവിതത്തിൽ ചേട്ടന്റേയും ഗുരുവിന്റേയും സ്ഥാനമാണെന്ന് നടി പ്രയാഗ മാർട്ടിൻ. മാതൃഭൂമി കപ്പ ടി.വി.ഹാപ്പിനെസ്സ് പ്രോജക്ടില്‍ സംസാരിക്കവേയാണ് ദിലീപിനെ കുറിച്ചും രാമലീല സിനിമയെ കുറിച്ചും ചിത്രം റിലീസ് ചെയ്തപ്പോഴുണ്ടായ പ്രതിസന്ധികളെ കുറിച്ചും പ്രയാഗ തുറന്നു പറഞ്ഞത്.

എനിക്കെപ്പോഴും നല്ല കാര്യങ്ങള്‍ മാത്രം പറഞ്ഞു തരുന്ന ആളായിരുന്നു അദ്ദേഹം. അദ്ദേഹത്തെ വളരെയധികം ബഹുമാനിക്കുന്ന ആളാണ് ഞാന്‍. അദ്ദേഹത്തിന് അങ്ങനെ ബുദ്ധിമുട്ടുള്ള സമയം വന്നപ്പോള്‍ തീര്‍ച്ചയായും വിഷമം ഉണ്ടായിരുന്നു. അദ്ദേഹത്തിന് നല്ലതു വരട്ടെ എന്ന് ആഗ്രഹിക്കുന്നതോടൊപ്പം തന്നെ രാമലീല സൂപ്പര്‍ ഹിറ്റ് ആയി മാറട്ടെ വിചാരിച്ച സമയവുമുണ്ട്- പ്രയാഗ പറയുന്നു.

നടി ആക്രമിക്കപ്പെട്ട കേസില്‍ അദ്ദേഹത്തിന്റെ പേര് വന്നപ്പോള്‍ വല്ലാത്തൊരു സാഹചര്യമായിരുന്നു. ഞാൻ അദ്ദേഹത്തിന് വേണ്ടി പ്രാർത്ഥിച്ചു. ഇതിന്റെ ശരിയെന്താണ് തെറ്റെന്താണ് എന്ന് പറയേണ്ട ആള്‍ ഞാന്‍ അല്ല. ഞാന്‍ പറഞ്ഞാല്‍ ഒട്ട് ശരിയാവുകയുമില്ല- പ്രയാഗ പറഞ്ഞു .