കാമുകിയുടെ കല്യാണം കൂടാനെത്തി; താലി ചാർത്തുന്നതിനു തൊട്ടുമുൻ‌പ് വധു കാമുകനെ കണ്ടു, ക്ലൈമാക്സിൽ വീണ്ടും ട്വിസ്റ്റ്

സാധാരണ സിനിമകളിൽ വിവാഹം നടക്കുമ്പോൾ മുടക്കാനായി എത്തുന്നത് കാമുകനോ കാമുകിയോ ആവും. എന്നാൽ, അത്തരമൊരു സംഭവം ജീവിതത്തിൽ നടന്നാലെങ്ങിനെ ഇരിക്കും. സിനിമയെ വെല്ലുന്ന ക്ലൈമാക്സ് ആണ് തെലങ്കാനയിലെ ഒരു കല്യാണമണ്ഡപത്തിൽ സംഭവിച്ചത്. 

വരൻ താലി അണിയിക്കുന്നതിന് നിമിഷങ്ങൾക്ക് മുൻപ് അതിഥികൾക്ക് ഇടയിൽ വധു തന്റെ കാമുകനെ കണ്ടു. ഇതോടെ വിവാഹത്തിൽ നിന്നും പിന്മാറുകയാണെന്നും ഈ വിവാഹം വേണ്ടെന്നും യുവതി വീട്ടുകാരോടും വരനോടും പറഞ്ഞു. ഇതോടെ വിവാഹം മുടങ്ങി. 

തെലങ്കാനയിലെ വനപാര്‍ട്ടി ജില്ലയിലെ ചാര്‍ലപ്പള്ളി ഗ്രാമത്തിലാണ് നാട്ടുകാരെ അമ്പരപ്പിച്ച സംഭവം നടന്നത്. വിവാഹ ചടങ്ങുകൾക്ക് ഇടയിൽ വരൻ താലി ചർത്തുന്നതിന് തൊട്ടു മുൻപാണ് സംഭവം. ബന്ധുക്കൾ യുവതിയെ അനുനയിപ്പിക്കാൻ ശ്രമിച്ചെങ്കിലും നടന്നില്ല. 

വിവാഹം വേണ്ടെന്ന് പറയുക മാത്രമല്ല, വിവാഹപന്തലിൽ നിന്നും യുവതി ഇറങ്ങിപ്പോവുക കൂടി ചെയ്തു. എന്നാൽ, വധു കാമുകനെ സ്വീകരിക്കുമെന്ന് കരുതിയവർ വീണ്ടും അമ്പരന്നു. യുവതി കാമുകനൊപ്പവും പോയില്ല.