‘മലയാളി മങ്കയോ തമിഴ് പെണ്‍കൊടിയോ, ആരാണ് കൂടുതല്‍ സുന്ദരി?’; നീയാ നാനാ എന്ന സംവാദ പരിപാടി വിവാദത്തില്‍

നീയാ നാനാ എന്ന സംവാദ പരിപാടി വിവാദത്തില്‍

തമിഴ് ചാനലായ വിജയ് ടിവിയിലെ നീയാ നാനാ എന്ന സംവാദ പരിപാടി വിവാദത്തില്‍. മലയാളി പെണ്‍കുട്ടികള്‍ക്കാണോ തമിഴ് പെണ്‍കുട്ടികള്‍ക്കാണോ സൗന്ദര്യം കൂടുതലെന്ന ചര്‍ച്ചയാണ് പരിപാടിയെ വിവാദത്തില്‍ എത്തിച്ചത്. ചാനല്‍ പരിപാടിയുമായി ബന്ധപ്പെട്ട വിവാദത്തില്‍ വ്യാപക പ്രതിഷേധമാണ് ഉയര്‍ന്നിരിക്കുന്നത്. 

പരമ്പരാഗത വേഷത്തിലായിരുന്നു പരിപാടിയില്‍ സ്ത്രീകള്‍ പങ്കെടുത്തത്. മലയാളി മങ്കമാര്‍ സെറ്റ് സാരിയും തമിഴ് പെണ്‍കുട്ടികള്‍ കാഞ്ചീപുരവുമായിരുന്നു ധരിച്ചിരുന്നത്. സ്ത്രീകളെ ഇത്തരത്തില്‍ മോശമായി ചിത്രീകരിക്കുന്നതിനെതിരെ നിയമപ്രകാരം കേസെടുക്കണമെന്നും സംപ്രേഷണം തടയണമെന്നും ആവശ്യപ്പെട്ട് കാഞ്ചീപുരത്തെ മക്കള്‍ മണ്‍ട്രം എന്ന സംഘടന പൊലീസില്‍ പരാതി നല്‍കിയിരുന്നു. ഇതോടെ പരിപാടി പിന്‍വലിക്കുകയാണെന്ന് സംവിധായകന്‍ അന്തോണി അറിയിച്ചു. പരിപാടിയുടെ ഉദ്ദേശ ശുദ്ധി തെറ്റിദ്ധരിക്കപ്പെടുകയായിരുന്നു എന്നാണ് അദ്ദേഹം പറഞ്ഞു.