വീടിന്റെ മുറ്റത്തൊരു തുളസിച്ചെടി നില്‍ക്കുന്നത് ഐശ്വര്യമാണ്. ഈ കാഴ്‌ച കണ്ണിന് കുളിര്‍മ നല്‍കുന്നതിനൊപ്പം തന്നെ നിൽക്കുന്ന മണ്ണ് പോലും ശുദ്ധീകരിക്കുകയും ചെയ്യുമെന്നാണ് പഴമക്കാര്‍ പറയുന്നത്. തുളസി പലതരത്തില്‍ ഉണ്ടെങ്കിലും കൃഷ്ണ തുളസിയാണ് ഐശ്വര്യവും ദേവപ്രീതിയും പകരുന്നതില്‍ മുന്നില്‍.
തുളസിത്തറയില്‍ മാത്രമെ തുളസി നടാവു എന്ന് ചിട്ടയൊന്നുമില്ല. കൂടാതെ തുളസിത്തറയില്‍ ഒരു തുളസിച്ചെടിയെ പാടുള്ളൂവെന്ന് വിശ്വസിക്കുന്നവരുണ്ട്. എന്നാല്‍, അതൊരു തെറ്റായ വിശ്വാസമാണ്. ഒന്നിലധികം തൈകൾ നട്ടുവളര്‍ത്തുന്നതില്‍ ഒരു തെറ്റുമില്ല.
വീടിന്റെ കിഴക്കുഭാഗത്തായി പ്രധാന വാതിലിന് നേർക്ക് തുളസിത്തറ പണിതാൽ ഫലങ്ങൾ ഏറുമെന്നാണ് വിദഗ്ദര്‍ അഭിപ്രായപ്പെടുന്നത്. നിത്യേന വെള്ളമൊഴിച്ച് കൊടുക്കുന്നതിനൊപ്പം തുളസി നില്‍ക്കുന്ന മണ്ണ് ശുദ്ധമായി സംരക്ഷിക്കുകയും വേണം.
വൈകിട്ട് വീട്ടില്‍ വിളക്കുവച്ച ശേഷം തുളസിത്തറയില്‍ സന്ധ്യാദീപം തെളിയിക്കുന്നത് കുടുംബത്തിനും മനസിനും ഐശ്വര്യമുണ്ടാക്കും. എന്നാല്‍, തുളസിത്തറയില്‍ നിന്നും അനാവശ്യമായി തുളസിയില മുറിച്ചെടുക്കുന്നത് നല്ലതല്ല.
പഴയ നാലുകെട്ട് രീതിയിലുള്ള ഒട്ടുമിക്ക വീടുകളുടേയും നടുവിലായി നടുമുറ്റം ഉണ്ടാകാറുണ്ട്. ഈ നടുമുറ്റത്തിന്റെ വടക്കു-കിഴക്കേ മൂലയിലായിരിക്കണം മുല്ലത്തറയുടെ സ്ഥാനമെന്നാ‍ണ് വാസ്തു പറയുന്നത്. നടുമുറ്റത്തല്ലെങ്കില്‍പോലും മുല്ലത്തറ വീടിന്റെ വടക്കുകിഴക്കെ മുറ്റത്താണ്‌ വേണ്ടതെന്നാണ് വാസ്തു ആചാ‍ര്യന്മാര്‍ പറയുന്നത്.
ഇപ്പോള്‍ ഉള്ള ഒട്ടു മിക്ക വീടുകളും ഏകശാലയാണ്. ഇത്തരം വീടുകള്‍ക്ക് തെക്കിനിപ്രാധാന്യം അല്ലെങ്കില്‍ പടിഞ്ഞാറ്റിനിയാണ് പ്രാധാന്യം എന്നതാണ് തത്വം. വീടിന്റെ വടക്കുവശത്താണ്‌ അങ്കണം നിര്‍മ്മിക്കുന്നത് എന്നതാണ് തെക്കിനി പ്രാധാന്യമായ വീട് എന്നതിനര്‍ഥം. അതിനാല്‍ തെക്കിനിപ്പുര മാത്രമുള്ള വീടുകളില്‍ വടക്കേമുറ്റത്ത്‌ മദ്ധ്യത്തില്‍നിന്നു കിഴക്കോട്ടുമാറിയായിരിക്കണം തുളസിത്തറ പണിയേണ്ടത്‌.
വീടിന്റെ അങ്കണം കിഴക്കുവശം എന്ന രീതിയില്‍ വരുന്നതിനെയാണ് പടിഞ്ഞാറ്റിനി എന്ന് പറയുന്നത്. അതുകൊണ്ടുതന്നെ പടിഞ്ഞാറുള്ള വീടുകള്‍ക്ക് കിഴക്കേ മുറ്റത്ത്‌ മദ്ധ്യത്തില്‍ നിന്നും വടക്കുമാറിയാണ്‌ തുളസിത്തറ നിര്‍മ്മിക്കേണ്ടതെന്നും വാസ്തു പറയുന്നു. എവിടെയാണെങ്കിലും വീടിന്റെ തറയുടെ ഉയരത്തേക്കാള്‍ കൂടുതലാകരുത് തുളസിത്തറയുടെ ഉയരമെന്നും വിദഗ്ധര്‍ അഭിപ്രായപ്പെടുന്നു.
തെക്കിനിയുടെ വടക്കേ മുറ്റത്തു നിര്‍മ്മിക്കുന്ന തുളസിത്തറയുടെ തെക്കേഭാഗത്ത്‌ വീട്ടില്‍ നിന്നും കാണുന്ന രീതിയിലാണ്‌ വിളക്കുകൊളുത്താനുള്ള സ്ഥാനമൊരുക്കേണ്ടത്‌. അതുപോലെത്തന്നെ വീടിന്റെ കിഴക്കേ മുറ്റത്തുള്ള തുളസിത്തറയില്‍ തുളസിത്തറയുടെ പടിഞ്ഞാറുഭാഗത്ത്‌ വീട്ടില്‍നിന്നു കാണുന്നരീതിയില്‍ വിളക്ക് കൊളുത്തുന്നതിനുള്ള സൗകര്യവുമൊരുക്കണം. അതായത് വിളക്ക് വീടിന് അഭിമുഖമായി വരണമെന്നു സാരം.
