ഡബ്ല്യുസിസിയിൽ ചേരേണ്ട ആവശ്യമെനിക്കില്ല: നിത്യ മേനോൻ

മലയാള സിനിമയിലെ ബോൾഡ് അഭിനേതാക്കളിൽ ഒരാളാണ് നിത്യ മേനോൻ. ഏത് കാര്യമാണെങ്കിലും അതിനെ സ്വതന്ത്ര്യമായി കൈകാര്യം ചെയ്യാനാണ് താല്പര്യമെന്ന് നിത്യ പറയുന്നു. ഡബ്ല്യുസിസിയിൽ അംഗമാകുന്നതിനെ കുറിച്ച് അഭിമുഖത്തിൽ ചോദ്യമുയർന്നപ്പോഴാണ് നിത്യ തന്റെ കാഴ്ചപ്പാട് തുറന്നു പറഞ്ഞത്.

മലയാള സിനിമയില്‍ നിന്നും ഒരു നടി ആക്രമിക്കപ്പെടുകയും സഹപ്രവര്‍ത്തകരായ കൂട്ടുകാരികള്‍ ഒരു കൂട്ടായ്മ രൂപീകരിക്കുകയും ചെയ്തപ്പോള്‍ അതിന്റെ ഭാഗമാവണമെന്ന് നിത്യയ്ക്ക് ഒരിക്കലും തോന്നിയിട്ടില്ലേ എന്ന ചോദ്യത്തിനു ഉത്തരമേകുകയായിരുന്നു നിത്യ മേനോന്‍. 

ആളുകള്‍ അഭിമുഖീകരിക്കുന്ന പ്രശ്‌നം പൂര്‍ണ്ണമായും ഞാന്‍ മനസ്സിലാക്കുന്നു. പ്രത്യക്ഷത്തിൽ ഇടപെടുന്നില്ലെന്ന് കരുതി ഞാൻ അതിനെ പ്രതിരോധിക്കുന്നില്ലെന്നല്ല അർത്ഥം. എന്റെ ജോലി തന്നെയാണ് പ്രതിരോധത്തിനുള്ള മാര്‍ഗ്ഗമെന്നു ഞാന്‍ വിശ്വസിക്കുന്നു. ഞാന്‍ ജോലി ചെയ്യുന്ന രീതി, ചെയ്യുന്ന കാര്യങ്ങള്‍, ആളുകളെ സമീപിക്കുന്ന രീതി അതിലൂടെയൊക്കെ ഇത്തരം കാര്യങ്ങളെ എനിക്ക് പ്രതിരോധിക്കാൻ കഴിയും. അതിനാൽ ഏതെങ്കിലും സംഘടനയുടെ കീഴിൽ നിൽക്കണമെന്ന് ഇതുവരെ തോന്നിയിട്ടില്ല. 

ഇത്തരം കാര്യങ്ങളെ നേരിടാന്‍ എനിക്ക് എന്റേതായൊരു രീതിയുണ്ടെന്നു മാത്രം. ആരെങ്കിലും മോശമായി പെരുമാറിയാലോ ലൈംഗിക ചുവയോടെ സംസാരിച്ചാലോ സെറ്റില്‍ നിന്നും ഇറങ്ങിപ്പോവുമോ എന്നു ചോദിച്ചപ്പോള്‍ തീര്‍ച്ചയായും, ഞാന്‍ പോയിട്ടുമുണ്ടെന്ന് ചിത്രത്തിന്റെ പേരു വെളിപ്പെടുത്താതെ നിത്യ പറഞ്ഞു. ഞാന്‍ ചെയ്തിട്ടുണ്ട്. പക്ഷേ ഞാനത് നിശബ്ദയായാണ് ചെയ്തത്. ഇത്തരത്തിലൊരു അനുഭവം കൊണ്ട് ഒരു ചിത്രത്തിനോട് ഞാന്‍ നോ പറഞ്ഞിട്ടുണ്ട്.- നിത്യ പറയുന്നു.