ഇന്ത്യന്‍ സിനിമയില്‍ ഏറ്റവുമധികം പ്രേക്ഷപ്രീതിയുള്ള സിനിമാറ്റിക് യൂണിവേഴ്‌സാണ് യാഷ് രാജ് ഫിലിംസിന്റെ സ്‌പൈ യൂണിവേഴ്‌സ്. ഏക് ഥാ ടൈഗര്‍ മുതല്‍ ടൈഗര്‍ 3 വരെ അഞ്ച് സിനിമകളാണ് ഫ്രാഞ്ചൈസിയില്‍ ഇതിനകം എത്തിയത്. നാല് സിനിമകളില്‍ ഇനിയും വരാനുണ്ട്. ഇപ്പോഴിതാ യാഷ് രാജ് സ്‌പൈ യൂണിവേഴ്‌സില്‍ വനിതാ ഏജന്റുമാരും എത്തുന്നതായുള്ള റിപ്പോര്‍ട്ടാണ് വരുന്നത്.
ടൈഗര്‍ ഫ്രാഞ്ചൈസിയിലൂടെ സല്‍മാന്‍ ഖാനും വാര്‍ സിനിമയിലൂടെ ഹൃത്വിക് റോഷനും പത്താനിലൂടെ ഷാറൂഖ് ഖാനുമാണ് നിലവില്‍ സ്‌പൈ വേഴ്‌സിലുള്ളത്. സ്ത്രീ താരങ്ങളായി കത്രീന കൈഫ്, ദീപിക പദുക്കോണ്‍ എന്നീ താരങ്ങളും ഈ ഫ്രഞ്ചൈസിയിലുണ്ട്. എന്നാല്‍ നായികപ്രാധാന്യമുള്ള സ്‌പൈ സിനിമ ഫ്രാഞ്ചൈസിയില്‍ നിന്നും ഇതുവരെ പുറത്തുവന്നിട്ടില്ല. വാര്‍ 2 എന്ന സിനിമയ്ക്ക് ശേഷമുള്ള സിനിമയായ ആല്‍ഫയിലാകും 2 പുതിയ നായികമാരും ഫ്രാഞ്ചൈസിയില്‍ ഭാഗമാവുക. ആലിയ ഭട്ടും യുവതാരം ഷര്‍വരി വാഗുമാണ് സിനിമയിലെ കേന്ദ്രകഥാപാത്രങ്ങളെ അവതരിപ്പിക്കുന്നത്. യൂണിവേഴ്‌സിലെ മുന്‍ സിനിമകളെ പോലെ ആക്ഷന്‍ രംഗങ്ങള്‍ക്ക് പ്രധാന്യം നല്‍കിയാകും സിനിമ ഒരുക്കുന്നത്. നിലവില്‍ ചിത്രീകരണം നടക്കുന്ന സിനിമ 2025 ഡിസംബര്‍ 25നാകും റിലീസ് ചെയ്യുക.
