കൊവിഡ് 19 കാരണം തിയേറ്ററുകളില്‍ അഞ്ചുദിവസം മാത്രം കളിക്കാന്‍ കഴിഞ്ഞ കപ്പേള എന്ന ചിത്രം അടുത്തിടെ നെറ്റ്ഫ്ലിക്സിൽ പുറത്തിറങ്ങി മികച്ച പ്രതികരണം സ്വന്തമാക്കിയിരുന്നു. സംവിധായകൻ അനുരാഗ് കശ്യപ് അടക്കമുളള പ്രമുഖ ചിത്രത്തെ പ്രശംസിച്ച് രംഗത്തെത്തി. അന്ന ബെന്നിനൊപ്പം റോഷന്‍ മാത്യു, ശ്രീനാഥ് ഭാസി, തന്‍വി റാം തുടങ്ങിയവരാണ് ചിത്രത്തില്‍ പ്രധാന വേഷങ്ങളില്‍ എത്തിയത്.
കപ്പേളയില്‍ ജെസി എന്ന കഥാപാത്രമായി എത്തിയ അന്നയുടെ പ്രകടനം വലിയ രീതിയില്‍ ശ്രദ്ധിക്കപ്പെട്ടിരുന്നു. റോഷന്‍ മാത്യുവും ശ്രീനാഥ് ഭാസിയും തമ്മിലുള്ള റിയലിസ്റ്റിക് ഫൈറ്റ് സീനിനെ കുറിച്ച് പറയുകയാണ് ഇപ്പോള്‍ അന്ന ബെൻ. അവര്‍ രണ്ടും ശരിക്കും തല്ലുകൂടുകയായിരുന്നുവെന്നും രണ്ട് പേര്‍ക്കും നന്നായി വേദനിച്ചുവെന്നും അന്ന പറഞ്ഞു. എല്ലാം റിയലായി ചെയ്തതുകൊണ്ട് തന്നെ സിനിമ കാണുമ്പോള്‍ അതെല്ലാം നന്നായി വന്നിട്ടുണ്ടെന്നും അന്ന ബെന്‍ പറഞ്ഞു.
സംവിധാന മികവുകൊണ്ടും താരങ്ങളുടെ അസാമാന്യമായ പ്രകടനം കൊണ്ടുമാണ് ചിത്രത്തിന് ജനങ്ങളുടെ ഹൃദയത്തിലേക്ക് ചേക്കേറാനായത്.