മമ്മൂട്ടിയും മഞ്ജു വാര്യരും ഇതുവരെ ഒന്നിച്ച് അഭിനയിച്ചിട്ടില്ല. ഇരുവരും ജോഡിയാകുന്ന ഒരു സിനിമ എന്ന് സംഭവിക്കുമെന്ന ധാരണയും ഇപ്പോഴും ആര്‍ക്കുമില്ല.
ക്യാമറാമാന്‍ വേണു ആദ്യമായി ഒരു ചിത്രം സംവിധാനം ചെയ്തപ്പോള്‍ മഞ്ജു വാര്യരായിരുന്നു നായിക. എം ടി വാസുദേവന്‍ നായരുടെ തിരക്കഥയില്‍ വിരിഞ്ഞ ‘ദയ’ എന്ന ആ ചിത്രം പക്ഷേ ബോക്സോഫീസില്‍ വലിയ ചലനം സൃഷ്ടിച്ചില്ല. വേണുവിന്‍റെ രണ്ടാം ചിത്രം വര്‍ഷങ്ങള്‍ക്ക് ശേഷം സംഭവിച്ചു. മുന്നറിയിപ്പ് എന്ന ആ സിനിമയില്‍ മമ്മൂട്ടിയായിരുന്നു നായകന്‍.
വേണുവിന്‍റെ മൂന്നാമത് സംവിധാന സംരംഭം ഫഹദ് ഫാസില്‍ നായകനാകുന്ന കാര്‍ബണ്‍ ആണ്. ഫഹദിന്‍റെ നായികയായി എത്തുന്നത് മം‌മ്ത മോഹന്‍‌ദാസ്. ഫഹദ് ഫാസിലിന് 2018ല്‍ ഉള്ള മേജര്‍ റിലീസാണ് ‘കാര്‍ബണ്‍’.
തികച്ചും ഗ്രാമീണനായ സിബി എന്ന കഥാപാത്രത്തെയാണ് ഈ ചിത്രത്തില്‍ ഫഹദ് അവതരിപ്പിക്കുന്നത്. ഫഹദ് ഒട്ടേറെ മികച്ച കഥാപാത്രങ്ങളെ നമുക്ക് സമ്മാനിച്ചിട്ടുണ്ടെങ്കിലും കാര്‍ബണ്‍ അദ്ദേഹത്തിന്‍റെ കരിയറിലെ ഏറ്റവും വെല്ലുവിളിയുയര്‍ത്തുന്ന കഥാപാത്രമായിരിക്കും എന്നാണ് റിപ്പോര്‍ട്ടുകള്‍.
ഇന്ത്യയിലെ വിഖ്യാതനായ ഛായാഗ്രാഹകന്‍ കെ യു മോഹനന്‍ ആണ് കാര്‍ബണിന് ഛായാഗ്രഹണം നിര്‍വഹിക്കുന്നത്. ഡോണ്‍, റായീസ്, തലാഷ് തുടങ്ങിയ വമ്പന്‍ ബോളിവുഡ് ചിത്രങ്ങളുടെ ക്യാമറാമാനാണ് അദ്ദേഹം. ഒട്ടേറെ ദേശീയ പുരസ്കാരങ്ങള്‍ നേടിയിട്ടുള്ള, സംവിധായകന്‍ കൂടിയായ സംഗീത സംവിധായകന്‍ വിശാല്‍ ഭരദ്വാജ് ആണ് ഈ സിനിമയുടെ സംഗീതം. വേണുവിന്‍റെ പത്നിയും ദേശീയ അവാര്‍ഡ് ജേതാവുമായ ബീനാപോള്‍ വേണു ആണ് എഡിറ്റിംഗ്.
ദിലീഷ് പോത്തന്‍, അശോകന്‍, സൌബിന്‍, വിജയരാഘവന്‍, നെടുമുടി വേണു, മണികണ്ഠന്‍, ലെന, കൊച്ചുപ്രേമന്‍ തുടങ്ങിയവരും കാര്‍ബണില്‍ അഭിനയിക്കുന്നു.