വയനാട് ദുരന്തം: പുതിയ സിനിമയുടെ റിലീസ് മാറ്റിവെച്ച് ആസിഫ് അലി
തങ്കത്തിന്റെ തിരക്കഥയില്‍ നഹാസ് നാസര്‍ സംവിധാനം ചെയ്യുന്ന ചിത്രത്തില്‍ ആസിഫിനൊപ്പം സുരാജ് വെഞ്ഞാറമൂടും ശ്രദ്ധേയമായ വേഷം അവതരിപ്പിച്ചിരിക്കുന്നു
വയനാട് ഉരുള്‍പൊട്ടല്‍ ദുരന്തത്തിന്റെ പശ്ചാത്തലത്തില്‍ തന്റെ പുതിയ സിനിമയുടെ റിലീസ് മാറ്റിവെച്ച് ആസിഫ് അലി. ഓഗസ്റ്റ് രണ്ടിനു റിലീസ് ചെയ്യാനിരുന്ന ചിത്രം അഡിയോസ് അമിഗോയുടെ റിലീസാണ് നീട്ടിയത്. പുതിയ തിയതി അണിയറ പ്രവര്‍ത്തകര്‍ പിന്നീട് പ്രഖ്യാപിക്കും. ആസിഫ് അലി സോഷ്യല്‍ മീഡിയയിലൂടെയാണ് ഇക്കാര്യം അറിയിച്ചത്.
' അഡിയോസ് അമിഗോ റിലീസ് ഓഗസ്റ്റ് 2 ല്‍ നിന്നും മാറ്റിവെയ്ക്കുന്നു. നമ്മുടെ സഹോദരങ്ങള്‍ വിടപറയുമ്പോള്‍, ഒട്ടേറെ പേര്‍ക്ക് വീടും നാടും ഇല്ലാതാവുമ്പോള്‍,തകര്‍ന്നിരിക്കാതെ തോളോട് തോള്‍ ചേര്‍ന്ന്‌നില്‍ക്കാനും പ്രാര്‍ത്ഥിക്കാനും മാത്രമേസാധിക്കു. മറ്റൊന്നും ചിന്തിക്കാന്‍ ആവുന്നില്ല. നഷ്ടപ്പെട്ടതൊന്നും തിരികെ കിട്ടില്ലായിരിക്കും, പക്ഷെ മുന്നോട്ടു പോയെ പറ്റു നമുക്ക്. ആരുടെയും പ്രതീക്ഷകള്‍ ഒഴുകിപോവാതിരിയ്ക്കാന്‍ ഒരു മനസ്സോടെ ശ്രമിക്കാം, കൂടെനില്‍ക്കാം.' ആസിഫ് കുറിച്ചു.
തങ്കത്തിന്റെ തിരക്കഥയില്‍ നഹാസ് നാസര്‍ സംവിധാനം ചെയ്യുന്ന ചിത്രത്തില്‍ ആസിഫിനൊപ്പം സുരാജ് വെഞ്ഞാറമൂടും ശ്രദ്ധേയമായ വേഷം അവതരിപ്പിച്ചിരിക്കുന്നു. ആഷിഖ് ഉസ്മാനാണ് നിര്‍മാണം. ഗോപി സുന്ദറും ജേക്‌സ് ബിജോയും ചേര്‍ന്നാണ് പാട്ടുകള്‍ക്ക് സംഗീതം ഒരുക്കിയിരിക്കുന്നത്. പശ്ചാത്തല സംഗീതം ജേക്‌സ് ബിജോയ്.
