മോഹന്‍ലാലിനോടു മത്സരിക്കാന്‍ മമ്മൂട്ടി ചിത്രവും അണിയറയില്‍ ഒരുങ്ങുന്നു; ഏറ്റവും പുതിയ വിശേഷം

മമ്മൂട്ടിയെ നായകനാക്കി നവാഗതനായ ഡീനോ ഡെന്നീസ് സംവിധാനം ചെയ്ത 'ബസൂക്ക' ഡിസംബര്‍ 19 നു തിയറ്ററുകളിലെത്താനാണ് സാധ്യത

ഇത്തവണ ക്രിസ്മസിനു ബോക്‌സ്ഓഫീസില്‍ മോഹന്‍ലാല്‍-മമ്മൂട്ടി ക്ലാഷ്. ഏറെ നാളുകള്‍ക്ക് ശേഷമാണ് ഇരുവരുടെയും സിനിമകള്‍ ഒരേ സമയത്ത് തിയറ്ററുകളിലെത്തുന്നത്. മോഹന്‍ലാലിന്റെ ബറോസും മമ്മൂട്ടിയുടെ ബസൂക്കയും ആകും ഇത്തവണ ഏറ്റുമുട്ടുക. ക്രിസ്മസ് ദിനമായ ഡിസംബര്‍ 25 ബുധനാഴ്ചയാണ് ബറോസിന്റെ റിലീസ്. 

മമ്മൂട്ടിയെ നായകനാക്കി നവാഗതനായ ഡീനോ ഡെന്നീസ് സംവിധാനം ചെയ്ത 'ബസൂക്ക' ഡിസംബര്‍ 19 നു തിയറ്ററുകളിലെത്താനാണ് സാധ്യത. ചിത്രത്തിന്റെ പോസ്റ്റ് പ്രൊഡക്ഷന്‍ വര്‍ക്കുകള്‍ പുരോഗമിക്കുകയാണ്. ക്രിസ്മസിനു തന്നെ തിയറ്ററുകളിലെത്തിക്കാനാണ് അണിയറ പ്രവര്‍ത്തകരുടെ ആലോചന. ചിത്രത്തിന്റെ ടീസര്‍ നേരത്തെ പുറത്തുവന്നിരുന്നു. 

അതേസമയം മോഹന്‍ലാല്‍ ആദ്യമായി സംവിധാനം ചെയ്യുന്ന ബറോസിന്റെ റിലീസ് ഔദ്യോഗികമായി പ്രഖ്യാപിച്ചു. മഞ്ഞില്‍ വിരിഞ്ഞ പൂക്കള്‍, മണിച്ചിത്രത്താഴ് എന്നീ സിനിമകള്‍ റിലീസ് ചെയ്ത ഡിസംബര്‍ 25 ആണ് ആദ്യമായി സംവിധാനം ചെയ്യുന്ന സിനിമ തിയറ്ററുകളിലെത്തിക്കാന്‍ മോഹന്‍ലാല്‍ തിരഞ്ഞെടുത്തിരിക്കുന്നത്.