Bijumenon, Sivakarthikeyan
നീണ്ട 14 വര്‍ഷത്തെ ഇടവേളയ്ക്ക് ശേഷം മലയാളത്തിന്റെ പ്രിയതാരമായ ബിജുമേനോന്‍ തമിഴ് സിനിമയില്‍ തിരിച്ചെത്തുന്നു. ശിവകാര്‍ത്തികേയനെ നായകനാക്കി എ ആര്‍ മുരുഗദോസ് സംവിധാനം ചെയ്യുന്ന സിനിമയിലൂടെയാണ് താരം തമിഴ് സിനിമയിലേക്ക് മടങ്ങിയെത്തുന്നത്. സിനിമയുടെ നിര്‍മാതാക്കളായ ശ്രീലക്ഷ്മി മൂവീസാണ് ഇക്കാര്യം ഔദ്യോഗികമായി പ്രഖ്യാപിച്ചത്.
ചിത്രത്തിലേക്ക് ബിജുമേനോനെ സ്വാഗതം ചെയ്തുകൊണ്ടുള്ള വീഡിയോയും അണിയറപ്രവര്‍ത്തകര്‍ പുറത്തുവിട്ടിട്ടുണ്ട്. ദൈവത്തിന്റെ സ്വന്തം നാട്ടില്‍ നിന്നും ഒരു ഗംഭീര്‍ അഭിനേതാവ് തങ്ങള്‍ക്കൊപ്പം ചേര്‍ന്നിരിക്കുന്നു എന്നാണ് വീഡിയോക്കൊപ്പം നിര്‍മാതാക്കള്‍ കുറിച്ചത്. ആക്ഷന്‍ പശ്ചാത്തലത്തിലൊരുങ്ങുന്ന സിനിമയില്‍ പോലീസ് ഉദ്യോഗസ്ഥനായാണ് ബിജുമേനോന്‍ വരുന്നതെന്നാണ് വീഡിയോ നല്‍കുന്ന സൂചന.
ശിവകാര്‍ത്തികേയന്റെ കരിയറിലെ തന്നെ ഏറ്റവും ഉയര്‍ന്ന ബജറ്റിലാണ് സിനിമയൊരുങ്ങുന്നത്. കന്നഡ താരമായ രുഗ്മിണി വസന്താണ് സിനിമയില്‍ നായികയാകുന്നത്. അനിരുദ്ധ് രവിചന്ദര്‍ ആണ് സിനിമയുടെ സംഗീതം.
