ഹിന്ദി സിനിമാലോകത്തിന് ഇത് ബയോപിക്കുകളുടെ കാലമാണ്. രാഷ്ട്രീയ നേതാക്കളുടെയും സ്വന്തന്ത്രകാലത്തെ വീരനായകന്മാരുടേയും തുടങ്ങി അനവധി ബയോപിക്കുകളാണ് ബോളിവുഡിൽ വന്നുപോയത്. കൂട്ടത്തിൽ മിൽക്കാ സിംഗ്, മേരി കോം, പാൻ സിംഗ് തോമർ ക്രിക്കറ്റ് താരങ്ങളായ എംഎസ് ധോണി, സച്ചിൻ, മുഹമ്മദ് അസറുദ്ദിൻ എന്നിവരുടെ ജീവിതങ്ങളെ ആസ്പദമാക്കിയും ചിത്രങ്ങളൊരുങ്ങി. ഏറ്റവും ഒടുവിലായി ഇന്ത്യ കണ്ട എക്കാലത്തെയും മികച്ച ഓള്‍ റൗണ്ടര്‍ ആയ കപില്‍ ദേവിന്റെ ബയോപിക്കും അണിയറയിൽ ഒരുങ്ങുന്നു. ചിത്രത്തിന്റേതായി പുറത്തിറങ്ങിയ പോസ്റ്ററുകളെല്ലാം വൻ ജനശ്രദ്ധയാണ് ഏറ്റുവാങ്ങിയത്. ഏറ്റവും ഒടുവിൽ മറ്റൊരു ഇതിഹാസ താരത്തിന്റെ കൂടി ജീവിതം സിനിമയാകുന്നു എന്ന വാർത്തയാണ് പുറത്തുവരുന്നത്.
മുൻ ഇന്ത്യൻ നായകനും നിലവിലെ ബിസിസിഐ അധ്യക്ഷനുമായ സൗരവ് ഗാംഗുലിയുടെ ബയോപിക്കാണ് അണിയറയിലൊരുങ്ങുന്നത്. ബോളിവുഡിന്റെ ഹിറ്റ്മേക്കർ കരൺ ജോഹറാണ് ചിത്രം നിർമിക്കുന്നതെന്നാണ് റിപ്പോർട്ട്. ചിത്രത്തിന്റെ പ്രാഥമിക ചർച്ചകൾക്കായി കരൺ ജോഹറും സൗരവ് ഗാംഗുലിയും മുംബൈയിൽ ഒത്തുഊടിയെന്നും റിപ്പോർട്ടുണ്ട്. ചിത്രത്തിന്റെ പ്രാഥമിക ചർച്ചകൾ പുരോഗമിക്കുന്നുണ്ടെങ്കിലും ആരായിരിക്കണം സൗരവ് ഗാംഗുലിയായി സ്ക്രീനിലെത്തുക എന്ന കാര്യത്തിൽ ധാരണയായിട്ടില്ല. എന്നാൽ നടൻ ഹൃത്വിക് റോഷൻ താനായി വെള്ളിത്തിരയിൽ എത്തണമെന്നാണ് ആഗ്രഹമെന്നും അദ്ദേഹത്തെ തനിക്ക് ഒരുപാട് ഇഷ്ടമാണെന്നും ഗാംഗുലി അടുത്തിടെ വെളിപ്പെടുത്തിയിരുന്നു.
