നടി പറഞ്ഞ ദിവസങ്ങളിലോ സമയത്തോ നിവിൻ അവിടെയില്ല, ബലാത്സംഗ കേസിൽ നടന് ക്ലീൻ ചിറ്റ് നൽകി പോലീസ്

ബലാത്സംഗ കേസില്‍ നടന്‍ നിവിന്‍ പോളിക്ക് ക്ലീന്‍ ചിറ്റ്. കേസ് അന്വേഷിച്ച് കോതമംഗലം ഊന്നുകല്‍ പോലീസാണ് നിവിന്‍ പോളിക്ക് കുറ്റകൃത്യത്തില്‍ പങ്കില്ലെന്നും പ്രതിപ്പട്ടികയില്‍ നിന്ന് ഒഴിവാക്കുകയാണെന്നും വ്യക്തമാക്കി റിപ്പോര്‍ട്ട് സമര്‍പ്പിച്ചത്. കോതമംഗലം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയിലാണ് റിപ്പോര്‍ട്ട് സമര്‍പ്പിച്ചത്.

കൃത്യം ചെയ്തു എന്ന് അതിജീവിത തന്റെ മൊഴികളില്‍ ആരോപിക്കുന്ന ദിവസങ്ങളിലോ സമയത്തോ കൃത്യസ്ഥലത്തും സമയത്തും നിവിന്‍ ഉണ്ടായിരുന്നില്ലെന്നും ആരോപിക്കപ്പെട്ട കുറ്റം നിവിന്‍ ചെയ്തിട്ടില്ലെന്നും അതിനാല്‍ പ്രതിപട്ടികയില്‍ നിന്നും നടനെ ഒഴിവാക്കുകയാണെന്നും റിപ്പോര്‍ട്ടില്‍ പറയുന്നു. അന്വേഷണ ഉദ്യോഗസ്ഥനായ എറണാകുളം റൂറല്‍ ഡിവൈഎസ്പി ടി എം വര്‍ഗീസാണ് റിപ്പോര്‍ട്ട് നല്‍കിയത്.

സിനിമയില്‍ അവസരം നല്‍കാമെന്ന് വാഗ്ദാനം ചെയ്ത് നിവിന്‍ പോളി ഉള്‍പ്പടെ 6 പേര്‍ കൂട്ടബലാത്സംഗം ചെയ്‌തെന്നായിരുന്നു കോതമംഗലം സ്വദേശിനിയായ യുവതിയുടെ പരാതി. കേസില്‍ ആറാം പ്രതിയായിരുന്നു നിവിന്‍ പോളി. 2023 ഡിസംബര്‍ 14,15 തീയതികളില്‍ ദുബായില്‍ വെച്ചായിരുന്നു സംഭവമെന്നായിരുന്നു യുവതി പോലീസിന് നല്‍കിയ മൊഴി. 

മൊബൈല്‍ ഫോണില്‍ പീഡന ദൃശ്യങ്ങള്‍ പകര്‍ത്തിയെന്നും അത് പുറത്തുപ്പെടുമെന്ന് ഭീഷണിപ്പെടുത്തിയതായും യുവതി പറഞ്ഞിരുന്നു. ഇതിന്റെ അടിസ്ഥാനത്തില്‍ കൂട്ടബലാത്സംഗം, സ്ത്രീത്വത്തെ അപമാനിക്കല്‍ തുടങ്ങിയ വകുപ്പുകളാണ് ചുമത്തിയത്. എന്നാല്‍ യുവതി പറഞ്ഞ ദിവസങ്ങള്‍ നിവിന്‍ വര്‍ഷങ്ങള്‍ക്ക് ശേഷമെന്ന സിനിമയുടെ ഷൂട്ടിങ്ങിനായി കൊച്ചിയിലായിരുന്നുവെന്ന് സംവിധായകന്‍ വിനീത് ശ്രീനിവാസന്‍ പറഞ്ഞ്രുന്നു. യുവതി പരാതിയുമായി വന്നതിന് പിന്നാലെ തന്ന ആരോപണങ്ങള്‍ തള്ളികൊണ്ട് നിവിന്‍ പോളി രംഗത്തെത്തിയിരുന്നു.