മറ്റൊരു ‘തണ്ണീര്‍‌മത്തന്‍’ വരുന്നു; 'പ്രകാശൻ പറക്കട്ടെ' ചിത്രീകരണം ആരംഭിച്ചു

അജു വർഗീസും ധ്യാൻ ശ്രീനിവാസനും വീണ്ടും ഒന്നിക്കുന്ന ചിത്രമാണ് പ്രകാശൻ പറക്കട്ടെ. ദിലേഷ് പോത്തൻ, സൈജു കുറുപ്പ്, മാത്യു തോമസ് എന്നിവരും പ്രധാന വേഷങ്ങളിൽ എത്തുന്ന ചിത്രത്തിന് കഥയും തിരക്കഥയും ഒരുക്കിയിരിക്കുന്നത് ധ്യാൻ ശ്രീനിവാസനാണ്. കോഴിക്കോട് തിരുവമ്പാടിയിൽ ചിത്രീകരണം പുരോഗമിക്കുകയാണ്.  

തൻറെ സ്വപ്നത്തിലേക്ക് ചിറകടിച്ചു പറക്കാൻ ആഗ്രഹിക്കുന്ന ഒരു കുട്ടിയുടെ കഥയാണ് സിനിമ പറയുന്നത്. ഫീൽ ഗുഡ് വിഭാഗത്തിൽ ഉൾപ്പെടുത്താവുന്ന ചിത്രം കൂടിയായിരിക്കും ഇത്. നടി നിഷ സാരംഗും ചിത്രത്തിൻറെ ഭാഗമാണ്. ഗുരുപ്രസാദ് ഛായാഗ്രഹണവും രതിൻ രാധാകൃഷ്ണൻ എഡിറ്റിംഗും നിർവഹിക്കുന്നു. 

മനു മഞ്ജിത്ത് വരികൾക്ക് ഷാൻ റഹ്മാൻ സംഗീത സംവിധാനം ചെയ്യുന്നു. ഫണ്‍ടാസ്റ്റിക് സിനിമയുടെ ബാനറില്‍ അജു വർഗീസും വിശാഖ് സുബ്രഹ്മണ്യവും ടിനു തോമസും ചേർന്നാണ് ചിത്രം നിർമ്മിക്കുന്നത്.