ഗായത്രി അരുണിന്റെ 'അച്ഛപ്പം കഥകള്‍' മോഹന്‍ലാല്‍ ആയിരുന്നു പ്രകാശനം ചെയ്തത്.'അച്ഛനോര്‍മ്മകളില്‍ ജീവിക്കുന്ന എല്ലാ മക്കള്‍ക്കും വേണ്ടി പ്രിയപ്പെട്ട ഗായത്രി അരുണ്‍ എഴുതിയ 'അച്ഛപ്പം കഥകള്‍' ഞാന്‍ ഹൃദയപൂര്‍വ്വം പ്രകാശനം ചെയ്തതായി അറിയിക്കുന്നു' എന്നാണ് മോഹന്‍ലാല്‍ പറഞ്ഞത്. ഇപ്പോഴിതാ ഷൂട്ടിംഗ് തിരക്കുകള്‍ക്കിടയിലും സിദ്ദിഖ് പുസ്തകം വായിച്ചു തീര്‍ന്നു.
ഗായത്രി അരുണിന്റെ വാക്കുകള്‍
'അച്ഛനോര്‍മ്മകളില്‍ ജീവിക്കുന്ന മക്കള്‍ക്കും അതവര്‍ക്ക് നല്‍കിയ അച്ഛന്മാര്‍ക്കും എന്ന സമര്‍പ്പണത്തോടു കൂടിയാണ് അച്ഛപ്പം കഥകള്‍ എഴുതിയത്. പുസ്തകത്തിന്റെ ഒരു പ്രതി പ്രിയപ്പെട്ട സിദ്ദിഖ് ഇക്കക്ക് കൊടുക്കുമ്പോള്‍ ഞാന്‍ ഒട്ടും പ്രതീക്ഷിച്ചിരുന്നില്ല ഷൂട്ടിംഗ് തിരക്കുകള്‍ക്കിടയിലും അദ്ദേഹം ഇത്ര ശ്രദ്ധയോടെ ഇരുന്ന് വായിക്കും എന്ന്. എന്നാല്‍ അദ്ദേഹം അത് വായിച്ച് തീര്‍ത്തു , ഒറ്റ ദിവസം കൊണ്ട്!
അതിനു ശേഷം എന്നോട് പറഞ്ഞു എനിക്ക് എന്റെ മകളെ ഒരു ദിവസം പോലും പിരിഞ്ഞിരിക്കുന്നത് വിഷമമാണ്. 'പാര്‍ഷ്യാലിറ്റി' വായിച്ചപ്പോള്‍ മകളെ ഓര്‍ത്തു പോയി എന്ന്. അത് പറയുമ്പോള്‍ അദ്ദേഹത്തിന്റെ കണ്ണുകള്‍ നിറയുന്നുണ്ടായിരുന്നു.എന്റെ അച്ഛനെ ആണ് ആ നിമിഷം ഞാന്‍ കണ്ടത്. സ്‌നേഹം കൂടുമ്പോള്‍ കണ്ണ് നിറയുമായിരുന്ന എന്റെ അച്ഛപ്പത്തെ.'-ഗായത്രി അരുണ്‍ കുറിച്ചു.
