ഹൃത്വിക് റോഷന്‍- ഹോംബാലെ സിനിമ പൃഥ്വിരാജിന്റെ ടൈസണോ?

Hrithik Rosham Hombale movie updates

കഴിഞ്ഞ ദിവസമാണ് ഹോംബാലെയ്‌ക്കൊപ്പം സിനിമ ചെയ്യുന്നതായി ബോളിവുഡ് സൂപ്പര്‍ താരം ഹൃത്വിക് റോഷന്‍ പ്രഖ്യാപിച്ചത്. ഹിന്ദിയില്‍ വാര്‍ 2 എന്ന ചിത്രമാണ് ഹൃത്വിക്കിന്റേതായി പുറത്തിറങ്ങാനുള്ളത്. ഇതിന് പിന്നാലെ കൃഷ് ഫ്രാഞ്ചൈസിയിലെ നാലാമത് ചിത്രം ഹൃത്വിക് തന്നെ സംവിധാനം ചെയ്യുമെന്നും റിപ്പോര്‍ട്ടുകളുണ്ട്. ഈ പ്രൊജക്ടുകള്‍ക്കിടയിലാണ് ഹോംബാലെ ചിത്രത്തിന്റെ അപ്‌ഡേറ്റ് ഹൃത്വിക് പങ്കുവെച്ചത്. ഹോംബാലെയുമായി ഒന്നിക്കുന്നു എന്നതല്ലാതെ സംവിധായകന്‍ ആരാകും സിനിമ ഹിന്ദിയില്‍ തന്നെയാകുമോ എന്നീ കാര്യങ്ങളില്‍ യാതൊരു സൂചനയും ഹൃത്വികും ഹോംബാലെയും തന്നിരുന്നില്ല.

 ഇപ്പോഴിതാ ഹൃതിക് റോഷന്‍ സിനിമയുടെ സംവിധായകരുടെ പട്ടികയിലേക്ക് മലയാള നടനും സംവിധായകനുമായ പൃഥ്വിരാജിന്റെ പേരാണ് പറഞ്ഞുകേള്‍ക്കുന്നത്. നേരത്തെ ഹോംബാലെയുമായി ടൈസണ്‍ എന്ന സിനിമ പൃഥ്വിരാജ് പ്രഖ്യാപിച്ചിരുന്നെങ്കിലും ഇതിന്റെ പ്രാരംഭഘട്ട പ്രവര്‍ത്തനങ്ങള്‍ പോലും ആരംഭിച്ചിട്ടില്ല. ഹോംബാലെ ഫിലിംസിനൊപ്പം സലാര്‍ ചെയ്തിട്ടുള്ള പൃഥ്വിരാജ് സലാര്‍ രണ്ടാം ഭാഗത്തിലും ഹോംബാലെയ്‌ക്കൊപ്പമുണ്ട്. ഹോംബാലെയുടെ നിര്‍മാണത്തില്‍ ഒരു സിനിമയുണ്ടെന്ന് പൃഥ്വിരാജ് തന്നെ നേരത്തെ പ്രഖ്യാപിച്ചിട്ടുണ്ടെന്നിരിക്കെ ഈ ചിത്രത്തിലാകും ഹൃതിക് റോഷന്‍ എത്തുക എന്ന കാര്യമാണ് കന്നഡ മാധ്യമങ്ങള്‍ റിപ്പോര്‍ട്ട് ചെയ്യുന്നത്.

അതേസമയം ലൂസിഫറിന്റെ രണ്ടാം ഭാഗമായ എമ്പുരാന് ശേഷം വീണ്ടും ഒരു മോഹന്‍ലാല്‍ ചിത്രമാണ് പൃഥ്വിരാജ് ഒരുക്കുന്നത് എന്നും റിപ്പോര്‍ട്ടുകളുണ്ട്. എന്നാല്‍ ലൂസിഫര്‍ മൂന്നാം ഭാഗത്തിന് മുന്‍പായി 2 ചിത്രങ്ങള്‍ പൃഥ്വിരാജ് സംവിധാനം ചെയ്യുമെന്നും ഒരെണ്ണം മോഹന്‍ലാലിനൊപ്പവും ഒന്ന് ഹൃതിക്കിനൊപ്പവുമാണെന്നും ചില മാധ്യമങ്ങള്‍ പറയുന്നു. പൃഥ്വിരാജ് സംവിധായകവേഷത്തിലെത്തുകയാണെങ്കില്‍ ഹൃതിക്കിന് വില്ലനായി പ്രഭാസ് എത്തുമോ എന്ന കാര്യമാണ് ആരാധകര്‍ സംശയിക്കുന്നത്. അങ്ങനെയെങ്കില്‍ ഇന്ത്യന്‍ ബോക്‌സോഫീസിന്റെ റെക്കോര്‍ഡുകളെല്ലാം തിരുത്തപ്പെടുമെന്നും ആരാധകര്‍ പറയുന്നു.