ശിവകാര്‍ത്തികേയനും സായ് പല്ലവിയും ഒന്നിച്ച സിനിമയായ അമരന്‍ തമിഴകത്ത് മികച്ച പ്രതികരണമാണ് നേടുന്നത്. മേജര്‍ മുകുന്ദ് വരദരാജന്റെ ജീവിതം പറയുന്ന സിനിമ മികച്ച അഭിപ്രായം നേടി മുന്നേറുന്നതിനിടെ ചിത്രത്തെ പ്രശംസിച്ച് രംഗത്ത് വന്നിരിക്കുകയാണ് നടി ജ്യോതിക. ജയ് ഭീമിന് ശേഷം തമിഴ് സിനിമയിലെ ക്ലാസിക് എന്ന് സിനിമയെ പ്രശംസിച്ച താരം സിനിമയിലെ സായ് പല്ലവിയുടെ പ്രകടനത്തെ പറ്റിയും വാചാലയായി.
അമരന്‍ സിനിമയ്ക്കും ടീമിനും സല്യൂട്ട്. സംവിധായകന്‍ രാജ് കുമാര്‍ പെരിയസ്വാമി നിങ്ങള്‍ എന്തൊരു രത്മാണ് ഒരുക്കിയിരിക്കുന്നത്. ജയ് ഭീമിന് ശേഷം തമിഴ് സിനിമയില്‍ നിന്ന് മറ്റൊരു ക്ലാസിക്. അഭിനന്ദനങ്ങള്‍ ശിവകാര്‍ത്തികേയന്‍. നിങ്ങളെടുത്ത കഷ്ടപ്പാട് എന്തെന്ന് എനിക്ക് ഊഹിക്കാനാകും. സായ് പല്ലവി. നിങ്ങള്‍ എന്തൊരു നടിയാണ്. അവസാനത്തെ പത്ത് മിനിറ്റില്‍ നീ എന്റെ ഹൃദയവും ശ്വാസവും എടുത്തു. നിന്നെയോര്‍ത്ത് അഭിമാനിക്കുന്നു. ഇന്ദു റബേക്ക വര്‍ഗീസ് നിങ്ങളുടെ ത്യാഗവും പോസിറ്റിവിറ്റിയും എന്റെ ഹൃദയത്തെയും ആത്മാവിനെയും സ്പര്‍ശിച്ചു. മേജര്‍ മുകുന്ദ് വരദരാജന്‍ നിങ്ങള്‍ ഇവിടെയിരുന്ന് ഞങ്ങളെ കാണുന്നുണ്ടെങ്കില്‍ എല്ലാ ജനങ്ങളും നിങ്ങളുടെ ധൈര്യത്തെ പ്രശംസിക്കുന്നു. ഞങ്ങളുടെ മക്കളെയും നിങ്ങളെ പോലെ വളര്‍ത്തും. ജ്യോതിക കുറിച്ചു.
