സജീവരാഷ്ട്രീയത്തിലേക്കുള്ള തന്റെ പ്രവേശനം പ്രഖ്യാപിച്ച തമിഴ് സൂപ്പര്‍ താരം വിജയുടെ 2 സിനിമകള്‍ മാത്രമാണ് ഇനി റിലീസിനായി ബാക്കിയുള്ളത്. നിലവില്‍ വെങ്കട് പ്രഭു സംവിധാനം ചെയ്യുന്ന ഗോട്ട് എന്ന സിനിമയ്ക്ക് ശേഷം മറ്റൊരു സിനിമയില്‍ കൂടി താരം അഭിനയിക്കുമെന്നാണ് റിപ്പോര്‍ട്ടുകള്‍. ഗ്രേറ്റസ്റ്റ് ഓഫ് ഓള്‍ ടൈം എന്ന് പേരിട്ടിരിക്കുന്ന ഗോട്ട് എന്ന സിനിമയില്‍ വിജയ്ക്ക് നായികയായി ജ്യോതിക എത്തുമെന്ന് ആദ്യം വാര്‍ത്തകള്‍ വന്നിരുന്നെങ്കിലും സ്‌നേഹയാണ് സിനിമയില്‍ വിജയുടെ നായികയാകുന്നത്.
വേണ്ടത്ര പ്രാധാന്യമുള്ള വേഷമല്ല എന്നതിനാലാണ് ജ്യോതിക അവസരം വേണ്ടെന്ന് വെച്ചതെന്നാണ് വിവരം. എന്നാല്‍ ഇതാദ്യമായല്ല ജ്യോതിക ഒരു വിജയ് ചിത്രത്തിനോട് നോ പറയുന്നത്. 2017ല്‍ ആറ്റ്‌ലി സംവിധാനം ചെയ്ത ആക്ഷന്‍ ചിത്രമായ മെരസലിലെ അവസരവും ജ്യോതിക ഇത്തരത്തില്‍ നിരസിച്ചിരുന്നു. സിനിമയില്‍ നിത്യാ മേനോന്‍ ചെയ്ത വേഷമാണ് ജ്യോതികയ്ക്ക് ഓഫര്‍ ചെയ്തിരുന്നത്. എന്നാല്‍ അന്ന് സ്വന്തം സിനിമയുടെ പ്രൊഡക്ഷന്‍ തിരക്കുകളിലായതിനാല്‍ ജ്യോതിക വേഷം നിരസിക്കുകയായിരുന്നു.
ഖുഷി,തിരുമലൈ എന്നീ സിനിമകളിലാണ് ജ്യോതികയും വിജയും ഒരുമിച്ച് അഭിനയിച്ചിട്ടുള്ളത്. 2 സിനിമകളും ബോക്‌സോഫീസില്‍ വമ്പന്‍ ഹിറ്റുകളായിരുന്നു. 2003ലായിരുന്നു തിരുമലൈ റിലീസ് ചെയ്തത്. തുടര്‍ന്ന് 20 വര്‍ഷത്തിലേറെ കഴിഞ്ഞിട്ടും ഇരുവരും മറ്റൊരു സിനിമയില്‍ ഒന്നിച്ചഭിനയിച്ചിട്ടില്ല.