ബാഹുബലിക്ക് ശേഷം പ്രഭാസ് നായകനാകുന്ന ‘സാഹോ’ ഓഗസ്റ്റ് 30ന് റിലീസ് ചെയ്യുകയാണ്. 300 കോടി രൂപ ബജറ്റില്‍ ഒരുങ്ങുന്ന ഈ ത്രില്ലര്‍ ഒരു ഹോളിവുഡ് ചിത്രത്തിന്‍റെ സാങ്കേതികത്തികവോടെയാണ് പുറത്തിറങ്ങുന്നത്. ശ്രദ്ധ കപൂര്‍ നായികയാകുന്ന ചിത്രത്തില്‍ ജാക്കി ഷ്‌റോഫ്, നീല്‍ നിതിന്‍ മുകേഷ്, മന്ദിര ബേദി, ചുങ്കി പാണ്ഡേ, മഹേഷ് മഞ്ജരേക്കര്‍, അരുണ്‍ വിജയ്, ലാല്‍, ടിന്നു ആനന്ദ്, കിഷോര്‍ തുടങ്ങി എല്ലാ ഭാഷകളില്‍ നിന്നുമായി വന്‍ താരനിരയാണുള്ളത്.
തെലുങ്ക്, തമിഴ്, ഹിന്ദി ഭാഷകളിലായി റിലീസ് ചെയ്യുന്ന സാഹോ, ബാഹുബലിയുടെ ബ്ലോക്ബസ്റ്റര്‍ വിജയം ആവര്‍ത്തിക്കുമെന്ന് പ്രതീക്ഷിക്കപ്പെടുന്നു. അതേസമയം, സാഹോയുടെ വരവുമായി ബന്ധപ്പെട്ട് മറ്റ് പല സിനിമകളുടെയും റിലീസുകള്‍ മാറ്റി ക്രമീകരിക്കുന്നുണ്ട്. അതില്‍ പ്രധാനം മോഹന്‍ലാലും സൂര്യയും നായകന്‍‌മാരായ തമിഴ് ചിത്രം ‘കാപ്പാന്‍’ ആണ്. കെ വി ആനന്ദ് സംവിധാനം ചെയ്ത കാപ്പാന്‍ ഓഗസ്റ്റ് 30ന് റിലീസ് ചെയ്യാനാണ് തീരുമാനിച്ചിരുന്നത്.
സാഹോയുടെ വരവ് പ്രമാണിച്ച് കാപ്പാന്‍റെ റിലീസ് സെപ്‌റ്റംബര്‍ 20ലേക്ക് മാറ്റിയിരിക്കുകയാണ്. ആക്ഷന്‍ ത്രില്ലറായ കാപ്പാനില്‍ പ്രധാനമന്ത്രിയുടെ വേഷത്തിലാണ് മോഹന്‍ലാല്‍ എത്തുന്നത്. നാഷണല്‍ സെക്യൂരിറ്റി ഗാര്‍ഡിന്‍റെ ഉയര്‍ന്ന റാങ്കിലുള്ള ഉദ്യോഗസ്ഥനായി സൂര്യ എത്തുന്നു. മോഹന്‍ലാലിന്‍റെ മകനായി ആര്യ ആഭിനയിക്കുന്നു. സയേഷ, ബൊമന്‍ ഇറാനി, സമുദ്രക്കനി, ഷംന കാസിം തുടങ്ങിയവരാണ് മറ്റ് പ്രധാന കഥാപാത്രങ്ങളായി എത്തുന്നത്. തമിഴിലും തെലുങ്കിലുമായി റിലീസ് ചെയ്യും.
