കേശു ഈ വീടിന്റെ നാഥന്‍ 100 കോടി കളക്ഷന്‍ നേടിയ പോലെ, എന്റെ എല്ലാ പടങ്ങളും ലാഭമാണ്; നാദിര്‍ഷാ
30 കോടിക്കാണ് ഡിസ്‌നി പ്ലസ് ഹോട്ട് സ്റ്റാര്‍ ഈ ചിത്രത്തിന്റെ സംപ്രേഷണാവകാശം സ്വന്തമാക്കിയത്
ദിലീപിനെ നായകനാക്കി നാദിര്‍ഷാ സംവിധാനം ചെയ്ത ചിത്രമാണ് കേശു ഈ വീടിന്റെ നാഥന്‍. ദിലീപ് തന്നെയാണ് ചിത്രത്തിന്റെ നിര്‍മാതാക്കളില്‍ ഒരാള്‍. ഒടിടി പ്ലാറ്റ്‌ഫോമിലൂടെയാണ് ഈ സിനിമ റിലീസ് ചെയ്തത്. ഒട്ടേറെ നെഗറ്റീവ് അഭിപ്രായങ്ങള്‍ കേട്ടെങ്കിലും കേശു ഈ വീടിന്റെ നാഥന്‍ സാമ്പത്തികമായി വന്‍ ലാഭമായിരുന്നെന്ന് നാദിര്‍ഷാ പറയുന്നു.
30 കോടിക്കാണ് ഡിസ്‌നി പ്ലസ് ഹോട്ട് സ്റ്റാര്‍ ഈ ചിത്രത്തിന്റെ സംപ്രേഷണാവകാശം സ്വന്തമാക്കിയത്. ടാക്‌സ് അടക്കം കൂടി ചേരുമ്പോള്‍ ഞങ്ങള്‍ 37 കോടിയോളം ലഭിച്ചിട്ടുണ്ട്. അതുകൂടാതെ സാറ്റലൈറ്റ് അവകാശമൊക്കെ വേറെ. തിയറ്ററില്‍ ഒരു സിനിമ നൂറ് കോടി കളക്ട് ചെയ്താലാണ് ഇത്രയും വരുമാനം നിര്‍മാതാവിന് ലഭിക്കുക. അങ്ങനെ നോക്കുമ്പോള്‍ കേശു ഈ വീടിന്റെ നാഥന്‍ വലിയ ലാഭമാണെന്നും നാദിര്‍ഷാ പറഞ്ഞു.
തന്റെ മറ്റൊരു സിനിമയായ ഈശോയും ഒടിടിയില്‍ ആണ് എത്തിയത്. 4.40 കോടിയാണ് ആകെ ചെലവ്. ആ സിനിമയ്ക്ക് ഒടിടി പ്ലാറ്റ്‌ഫോമായ സോണി ലിവില്‍ നിന്ന് 10 കോടി ലഭിച്ചിട്ടുണ്ട്. തന്റെ എല്ലാ സിനിമകളും നിര്‍മാതാക്കള്‍ക്ക് ലാഭം ഉണ്ടാക്കി കൊടുത്തിട്ടുണ്ട്. അത് ദൈവാനുഗ്രഹമായാണ് കാണുന്നതെന്നും നാദിര്‍ഷാ പറഞ്ഞു. മേരാ നാം ഷാജിയും നിര്‍മാതാവിന് ലാഭമായിരുന്നു. ഉള്ളതില്‍ കുറച്ച് ലാഭം കുറവുണ്ടാക്കിയ സിനിമ മാത്രമാണ് മേരാ നാം ഷാജിയെന്നും നാദിര്‍ഷാ കൂട്ടിച്ചേര്‍ത്തു.
