17 വയസ്സുള്ളപ്പോഴായിരുന്നു 50 വയസ്സുള്ള ടൈഗർ പ്രഭാകറുമായുള്ള വിവാഹം, അയാൾക്ക് 3 ഭാര്യമാരുള്ളത് അറിയില്ലായിരുന്നു: അഞ്ജുവിൻ്റെ ജീവിതം

ബാലതാരമായെത്തി പിന്നീട് തെന്നിന്ത്യൻ സിനിമാലോകത്ത് നിറഞ്ഞുനിന്ന താരമാണ് അഞ്ജു പ്രഭാകർ. തമിഴ് സിനിമയിലൂടെയാണ് അരങ്ങേറ്റം കുറിച്ചതെങ്കിലും മലയാളം സിനിമകളിൽ താരം തിളങ്ങിയിരുന്നു. ദീർഘനാളായി അഭിനയലോകത്ത് നിന്നും വിട്ടുനിൽക്കുന്നതാരം അടുത്തിടെ അഭിനയത്തിലേക്ക് വീണ്ടും തിരിച്ചെത്തിയിരുന്നു. ഇതിനിടെ താരം നൽകിയ അഭിമുഖമാണ് ഇപ്പോൾ ശ്രദ്ധ നേടുന്നത്.

17 വയസ്സുള്ളപ്പോൾ താൻ വിവാഹിതയായെന്നും എന്നാൽ ചതിയിലൂടെയാണ് പ്രമുഖ നടൻ തന്നെ വിവാഹം കഴിച്ചതെന്നും അഞ്ജു പറയുന്നു. പതിനേഴാം വയസ്സിൽ താൻ എടുത്ത തീരുമാനം ജീവിതത്തെ തന്നെ ഇല്ലാതാക്കിയെന്നും താരം പറയുന്നു.ഒന്നര വയസ്സുള്ളപ്പോൾ അമ്മ ഒരു സിനിമയുടെ നൂറുദിന ആഘോഷപരിപാടിയിൽ എന്നെയും കൊണ്ടുപോയിരുന്നു. അങ്ങനെയാണ് സംവിധായകൻ മഹേന്ദ്രന് എന്നെ കണ്ട് ഇഷ്ടമാകുന്നത്. അതോടെ ബാലതാരമായി എനിക്ക് സിനിമയിൽ അവസരം ലഭിച്ചു.

അങ്ങനെ ഒട്ടേറെ സിനിമകളിൽ ബാലതാരമായതിന് ശേഷം തമിഴ്,മലയാളം,കന്നഡ,തെലുങ്ക് സിനിമകളിൽ നായികയാകാനായി. എന്നാൽ എനിക്ക് 17 വയസ്സുള്ളപ്പോൾ ഒരു കന്നഡ സിനിമ അഭിനയിക്കാനായി ബാംഗ്ലൂരിലേക്ക് പോയതോടെ എൻ്റെ ജീവിതം തന്നെ മാറിപോയി. അന്ന് കന്നഡ സിനിമയിൽ ഹീറോയായിരുന്ന ടൈഗർ പ്രഭാകറിനോട് പൃണയമായി. അങ്ങനെ ഞാൻ അദ്ദേഹത്തോട് എൻ്റെ പ്രണയം പറയുകയും വിവാഹം ചെയ്യാൻ അഭ്യർഥിക്കുകയും ചെയ്തു.

 എന്നാൽ അന്ന് നടൻ മൂന്ന് വിവാഹങ്ങൾ കഴിച്ചിരുന്നുവെന്നും ഇതിൽ എൻ്റെ പ്രായത്തിൽ വരുന്ന മക്കളുണ്ടെന്നോ എനിക്ക് അറിയാമായിരുന്നില്ല. ഇക്കാര്യം മറച്ച് വെച്ചുകൊണ്ട് അദ്ദേഹം എന്നെ വിവാഹം കഴിക്കാൻ നിർബന്ധിച്ചു. അന്നെനിക്ക് 17 വയസ്സ് മാത്രമായിരുന്നു പ്രായം. ഒരു വിവാഹത്തിന് ഞാൻ തയ്യാറായിരുന്നില്ല. എനിക്ക് 17ഉം പ്രഭാകറിന് 50 വയസ്സുമായിരുന്നു അന്ന്. ഇക്കാര്യം മാതാപിതാക്കളോട് പറഞ്ഞപ്പോൾ അവരത് വേണ്ടെന്ന് പറഞ്ഞെങ്കിലും അവരുടെ വാക്കുകൾ കേൾക്കാതെ ഞാൻ വീട് വിട്ടിറങ്ങി. അങ്ങനെ മാതാപിതാക്കളുടെ സമ്മതമില്ലാതെയായിരുന്നു വിവാഹം അഞ്ജു പറയുന്നു.

എന്നാൽ ഇതിനെല്ലാം ശേഷം പ്രഭാകർ മൂന്ന് തവണ വിവാഹിതനായിട്ടുണ്ടെന്നും കുട്ടികളുണ്ടെന്നും അറിഞ്ഞപ്പോൾ ഞാൻ ഞെട്ടിപോയി. ഇക്കാര്യം മറച്ചുവെച്ച് കൊണ്ട് എന്നെ ചതിച്ചതാണെന്ന് കൂടി അറിഞ്ഞപ്പോൾ ഞാൻ ആകെ തകർന്നു. എല്ലാം അറിഞ്ഞപ്പോഴേക്കും ഞാൻ ഗർഭിണിയായിരുന്നു. കൂടെ കഴിയാൻ താത്പര്യമില്ലാത്തതിനാൽ സ്വർണം പോലും എടുക്കാതെയാണ് അവിടെ വിട്ടിറങ്ങിയത്. അതിന് ശേഷം ഡിപ്രഷനിൽ ആയിരുന്നെന്നും പതിയെ സീരിയലുകളിൽ സജീവമാകുകയാണെന്നും അഞ്ജു പറഞ്ഞു.

 1996ൽ ആയിരുന്നു ടൈഗർ പ്രഭാകറുമായുള്ള അഞ്ജുവിൻ്റെ വിവാഹം. അടുത്ത വർഷം തന്നെ ഇവർ വേർപിരിഞ്ഞു.ഈ ബന്ധത്തിൽ ഇവർക്ക് അർജുൻ പ്രഭാകർ എന്നൊരു മകനുണ്ട്. 2001ൽ ടൈഗർ പ്രഭാകരനും മരണപ്പെട്ടിരുന്നു.