ഒ.ടി.ടി. റിലീസിനെത്തിയ മാലിക്ക് ഇതിനോടകം ഏറെ ശ്രദ്ധിക്കപ്പെട്ടു കഴിഞ്ഞു. കോവിഡ് പ്രതിസന്ധിയെ തുടര്‍ന്നാണ് സിനിമ തിയറ്ററില്‍ റിലീസ് ചെയ്യാന്‍ സാധിക്കാതെവന്നത്. എന്നാല്‍, വന്‍ ബജറ്റില്‍ തിയറ്റര്‍ അനുഭവം സാധ്യമാക്കുകയെന്ന ലക്ഷ്യത്തോടെയാണ് സിനിമ അണിയിച്ചൊരുക്കിയത്. ഒ.ടി.ടി. പ്ലാറ്റ്ഫോമില് ഇറക്കേണ്ടിവരുമെന്ന് ആദ്യമേ അറിയാമെങ്കില്‍ സിനിമ ഇങ്ങനെയായിരിക്കില്ല ഒരുക്കുകയെന്നാണ് സംവിധായകന്‍ മഹേഷ് നാരായണന്‍ പറയുന്നത്.
ഡിജിറ്റല്‍ പ്ലാറ്റ്ഫോമിലേക്ക് വേണ്ടിയായിരുന്നെങ്കില്‍ മാലിക്ക് മറ്റൊരു തരത്തിലായിരിക്കും എടുക്കുക. ഒരുപക്ഷേ, അതിനെയൊരു സീരിസ് ആയി അവതരിപ്പിക്കുമായിരുന്നു. അത്രത്തോളം കണ്ടന്റ് കൈയിലുണ്ടെന്നും മഹേഷ് പറഞ്ഞു. എന്നാല്‍, മാലിക്ക് ഒ.ടി.ടി. പ്ലാറ്റ്ഫോമില് എത്തിയ ശേഷവും പലരും ഇത് വെബ് സീരിസ് ആക്കുമോ എന്ന ചോദ്യം ഉന്നയിക്കുന്നുണ്ട്. എന്നാല്‍, മാലിക്ക് ഇവിടെ അവസാനിച്ചു എന്നും വെബ് സീരിസിനുള്ള സാധ്യത ഇനിയില്ലെന്നും മഹേഷ് വ്യക്തമാക്കി.
