Actress Kanakalatha passes away: നടി കനകലത അന്തരിച്ചു
കഴിഞ്ഞ വര്‍ഷം സഹോദരി വിജയമ്മയാണ് കനകലതയുടെ അസുഖത്തെ കുറിച്ച് ഒരു അഭിമുഖത്തില്‍ വെളിപ്പെടുത്തിയത്
Actress Kanakalatha passes away: പ്രമുഖ നടി കനകലത അന്തരിച്ചു. പാര്‍ക്കിന്‍സണ്‍സും മറവിരോഗവും കാരണം ഏറെനാളായി ചികിത്സയിലായിരുന്നു. തിരുവനന്തപുരത്തെ വസതിയിലായിരുന്നു അന്ത്യം. നാടകത്തിലൂടെ സിനിമയിലെത്തിയ കനകലത 350 ലേറെ സിനിമകളിലും ധാരാളം സീരിയലുകളിലും അഭിനയിച്ചിട്ടുണ്ട്.
ഒരു യാത്രാമൊഴി, ഗുരു, കിലുകില്‍ പമ്പരം, ആദ്യത്തെ കണ്‍മണി, എഫ്‌ഐആര്‍, പ്രിയം, ആകാശഗംഗ, അനിയത്തിപ്രാവ്, അഞ്ചരക്കല്യാണം, ദോസ്ത്, മയില്‍പ്പീലിക്കാവ്, കൗരവര്‍, കിരീടം, ജാഗ്രത, രാജാവിന്റെ മകന്‍ തുടങ്ങി ശ്രദ്ധേയമായ ഒട്ടേറെ സിനിമകളില്‍ കനകലത അഭിനയിച്ചിട്ടുണ്ട്. പൂക്കാലം എന്ന സിനിമയിലാണ് അവസാനമായി അഭിനയിച്ചത്.
കഴിഞ്ഞ വര്‍ഷം സഹോദരി വിജയമ്മയാണ് കനകലതയുടെ അസുഖത്തെ കുറിച്ച് ഒരു അഭിമുഖത്തില്‍ വെളിപ്പെടുത്തിയത്. 2021 മുതലാണ് നടിയില്‍ രോഗലക്ഷണങ്ങള്‍ കണ്ടതും രൂക്ഷമായതും. ഉറക്കക്കുറവായിരുന്നു തുടക്കം. 2022 ഓഗസ്റ്റില്‍ ഡോക്ടറെ കണ്ടതിനെ തുടര്‍ന്നു ഡിമന്‍ഷ്യ എന്ന രോഗത്തിന്റെ ആരംഭമാണെന്നു കണ്ടുപിടിച്ചു. എംആര്‍ഐ സ്‌കാനില്‍ തലച്ചോര്‍ ചുരുങ്ങുകയാണെന്നും കണ്ടെത്തി.
