സിനിമ മേഖലയിലെ വേര്‍തിരിവൂകളെ പറ്റി വെളിപ്പെടുത്തി നടി മംമ്ത മോഹന്‍ദാസ്. ഒരു തമിഴ് ഓണ്‍ലൈന്‍ മാധ്യമത്തിന് നല്‍കിയ അഭിമുഖത്തിലായിരുന്നു താരത്തിന്റെ തുറന്നുപറച്ചില്‍. സൂപ്പര്‍ സ്റ്റാര്‍ പോലെയുള്ള പദവികള്‍ വെറും പി ആര്‍ വര്‍ക്കാണെന്നും അത് ജനങ്ങള്‍ കൊടുക്കുന്നതല്ലെന്നും മംമ്ത വ്യക്തമാക്കി.
സൂപ്പര്‍ താരപദവി എന്നത് ചിലര്‍ സ്വയം പ്രഖ്യാപിക്കുകയാണ് ചെയ്യുന്നത്. അല്ലാതെ അത് പ്രേക്ഷകര്‍ കൊടുക്കുന്നതല്ല. അത് ഏത് ഇന്‍ഡസ്ട്രിയായാലും അങ്ങനെ തന്നെയാണ് അവര്‍ അത് പിആര്‍ ആളുകളെ വെച്ചുകൊണ്ട് ചെയ്യിക്കുന്നതാണ്. എനിക്ക് അങ്ങനെയാണ് തോന്നുന്നത്. ഞാന്‍ നായികയായി അഭിനയിച്ച ഒരുപാട് സിനിമകളില്‍ നിരവധി നായികമാര്‍ സെക്കന്‍ഡ് ഹീറോയിന്‍ ആയി അഭിനയിച്ചിട്ടുണ്ട്. ഞാനൊരിക്കലും അവരുടെ ചിത്രം പോസ്റ്ററില്‍ വെയ്ക്കരുതെന്നോ സിനിമയില്‍ ഉള്‍പ്പെടുത്തരുതെന്നോ ഗാനരംഗത്തില്‍ നിന്നും മാറ്റണമെന്നോ ആവശ്യപ്പെട്ടിട്ടില്ല. ഞാനും പല സിനിമകളില്‍ ഇത്തരത്തില്‍ സെക്കന്‍ഡ് ഹീറോയിന്‍ ആയിട്ടുണ്ട്.
മലയാളത്തില്‍ ഒരു നായിക തിരിച്ചുവരവ് നടത്തിയപ്പോള്‍ സിനിമയില്‍ സെക്കന്‍ഡ് ലീഡായി ഞാന്‍ അഭിനയിച്ചു. എന്നാല്‍ ഞാന്‍ നായികയായ ഒരു സിനിമയില്‍ അതിഥി താരമായി അവരെ വിളിച്ചപ്പോള്‍ അവര്‍ നോ പറഞ്ഞു.മംമ്ത വ്യക്തമാക്കി.
