'അമ്മ'യുടെ പ്രസിഡന്റായി മോഹന്‍ലാല്‍ തുടരും
തനിക്ക് പകരം പുതിയ ആശയങ്ങളുള്ള വ്യക്തി ജനറല്‍ സെക്രട്ടറി സ്ഥാനത്തേക്ക് എത്തണമെന്നും ബാബു പറഞ്ഞു
സിനിമാ താരങ്ങളുടെ സംഘടനയായ 'അമ്മ'യുടെ പ്രസിഡന്റായി നടന്‍ മോഹന്‍ലാല്‍ തുടരും. ജനറല്‍ സെക്രട്ടറി സ്ഥാനത്തു നിന്ന് ഇടവേള ബാബു ഒഴിയുന്ന സാഹചര്യത്തില്‍ മോഹന്‍ലാലും പ്രസിഡന്റ് സ്ഥാനം ഒഴിയുമെന്നാണ് നേരത്തെ റിപ്പോര്‍ട്ടുകള്‍ പുറത്തുവന്നിരുന്നത്. എന്നാല്‍ സംഘടനയുടെ പ്രസിഡന്റ് സ്ഥാനത്ത് മോഹന്‍ലാല്‍ തുടരുമെന്നാണ് ഇടവേള ബാബു പറയുന്നത്.
സ്ഥാനം ഒഴിയാന്‍ മോഹന്‍ലാല്‍ ആഗ്രഹിച്ചിരുന്നെങ്കിലും സംഘടനയിലെ മറ്റു ഭാരവാഹികള്‍ അദ്ദേഹത്തോട് സംസാരിച്ചിട്ടുണ്ട്. താനടക്കമുള്ളവര്‍ പ്രസിഡന്റ് സ്ഥാനം ഒഴിയരുതെന്ന് ലാലേട്ടനോട് അഭ്യര്‍ഥിച്ചിട്ടുണ്ട്. അദ്ദേഹം ഏറെക്കുറെ അതിനു സമ്മതിച്ചിട്ടുണ്ടെന്നും ഇടവേള ബാബു പറയുന്നു.
തനിക്ക് പകരം പുതിയ ആശയങ്ങളുള്ള വ്യക്തി ജനറല്‍ സെക്രട്ടറി സ്ഥാനത്തേക്ക് എത്തണമെന്നും ബാബു പറഞ്ഞു. ഞാന്‍ മാറണം, പുതിയ ആള്‍ക്കാര്‍ വരേണ്ട സമയമായി. ഞാന്‍ മാറുമ്പോള്‍ സ്വാഭാവികമായി പുതിയ ചിന്തകള്‍ വരുമെന്നും അദ്ദേഹം കൂട്ടിച്ചേര്‍ത്തു.
