തെന്നിന്ത്യൻ നായിക നയൻതാര പ്രധാന വേഷത്തിലെത്തി ശ്രദ്ധ നേടിയ ചിത്രമാണ് മൂക്കുത്തി അമ്മൻ. ചിത്രത്തിന്റെ രണ്ടാം ഭാഗം ഒരുങ്ങുന്നതായുള്ള വാർത്തകൾ നേരത്തെ വന്നിരുന്നു. ഈ സിനിമയുടെ പൂജ ചടങ്ങുകൾ പൂർത്തിയായിരിക്കുകയാണ്. ഒരു സിനിമയുടെയും പ്രൊമോഷന് പങ്കെടുക്കാത്ത നയൻതാര മൂക്കുത്തി അമ്മന്റെ രണ്ടാം ഭാഗത്തിന്റെ പൂജയിൽ പങ്കെടുത്തിരിക്കുകയാണ്.
ഈ ചടങ്ങിൽ നിർമാതാവ് ഇഷാരി കെ ഗണേഷ് നയൻതാരയെക്കുറിച്ച് പറഞ്ഞ വാക്കുകളും ശ്രദ്ധ നേടുന്നുണ്ട്. മൂക്കുത്തി അമ്മൻ രണ്ടാം ഭാഗത്തിനായി നയൻതാര ഒരു മാസത്തെ വ്രതത്തിലാണെന്നാണ് നിർമാതാവ് പറയുന്നത്. നടി മാത്രമല്ല നടിയുടെ കുട്ടികൾ പോലും വ്രതത്തിലാണെന്ന് അദ്ദേഹം പറഞ്ഞു. ഈ സിനിമയുടെ റിലീസ് പാൻ ഇന്ത്യൻ ലെവലിൽ ആയിരിക്കുമെന്നും അദ്ദേഹം പറയുന്നു.
സൂപ്പർഹിറ്റ് സംവിധായകൻ സുന്ദർ സി ആണ് ചിത്രം സംവിധാനം ചെയ്യുന്നത്. 2020-ൽ ആർ ജെ ബാലാജി, എൻ ജെ ശരവണൻ എന്നിവർ സംവിധാനം ചെയ്ത മൂക്കുത്തി അമ്മൻ കോമഡി പശ്ചാത്തലത്തിലാണ് ഒരുങ്ങിയത്. ഇതിന്റെ രണ്ടാം ഭാഗമായാണ് മൂക്കുത്തി അമ്മൻ 2 എത്തുന്നത്. മൂക്കുത്തി അമ്മൻ 2 വിന് 100 കോടിയാണ് ബജറ്റ് എന്നും സ്ഥിരീകരിക്കാത്ത റിപ്പോർട്ടുകളുണ്ട്.
