പ്രണവ് മോഹന്‍ലാലിന്‍റെ ആദ്യ സിനിമ ‘ആദി’ വന്‍ ഹിറ്റായതോടെ വമ്പന്‍ സംവിധായകരും ബാനറുകളും യുവതാരത്തിന്‍റെ ഡേറ്റിനായി ക്യൂ ആണ്. എന്നാല്‍ മനസിന് ഇഷ്ടപ്പെടുന്ന പ്രൊജക്ടുകളില്‍ മാത്രമേ അഭിനയിക്കൂ എന്ന് പ്രണവ് തീരുമാനമെടുത്തിട്ടുള്ളതിനാല്‍ പല തിരക്കഥകളും റിജക്ട് ആവുകയാണ്.
ഇപ്പോള്‍ ‘രാമലീല’യുടെ സംവിധായകന്‍ അരുണ്‍ ഗോപി സംസാരിച്ച ഒരു സബ്‌ജക്‍ട് പ്രണവിന് ഇഷ്ടപ്പെട്ടിരിക്കുകയാണ്. ലഭിക്കുന്ന വിവരം അനുസരിച്ച് ഹോളിവുഡ് നിലവാരമുള്ള ഒരു ആക്ഷന്‍ ത്രില്ലറിനാണ് അരുണ്‍ ഗോപി ശ്രമിക്കുന്നത്. കഥ കേട്ട് പ്രണവ് ത്രില്ലടിക്കുകയും ഗ്രീന്‍ സിഗ്നല്‍ നല്‍കുകയും ചെയ്തു.
അരുണ്‍ ഗോപി തന്നെയാണ് ഈ സിനിമയ്ക്ക് തിരക്കഥയെഴുതുകയും ചെയ്യുന്നത്. ‘ആദി’യില്‍ തകര്‍പ്പന്‍ ആക്ഷന്‍ രംഗങ്ങള്‍ കാഴ്ചവച്ച പ്രണവിന് അതിനേക്കാള്‍ മികച്ച ആക്ഷന്‍ സീക്വന്‍സുകള്‍ ഉള്‍പ്പെടുന്ന ഒരു തിരക്കഥയാണ് അരുണ്‍ ഗോപി തയ്യാറാക്കിയിരിക്കുന്നത്.
അരുണ്‍ ഗോപിയുടെ ആദ്യചിത്രം രാമലീല 50 കോടി ക്ലബില്‍ ഇടം പിടിച്ച സിനിമയാണ്. പ്രണവിനെ നായകനാക്കി ചെയ്യുന്ന ചിത്രം 100 കോടി ക്ലബില്‍ ഇടം പിടിക്കുന്ന വിധം ഒരുക്കാനാണ് അരുണ്‍ ഗോപിയുടെ പ്ലാന്‍. പുലിമുരുകനും രാമലീലയുമെടുത്ത് മലയാളികളെ വിസ്മയിപ്പിച്ച ടോമിച്ചന്‍ മുളകുപാടം തന്നെയാണ് ഈ സിനിമയും നിര്‍മ്മിക്കുന്നത് എന്നത് പ്രതീക്ഷകള്‍ക്ക് കൂടുതല്‍ കരുത്തുപകരുന്നു.