മലയാളത്തിലെ ഏറ്റവും വലിയ സൂപ്പര്‍ താരത്തിന്റെ മകന്‍ എന്ന നിലയില്‍ ആദ്യ സിനിമ തന്നെ സൂപ്പര്‍ ഹിറ്റാക്കിയ നടനാണ് പ്രണവ് മോഹന്‍ലാല്‍. ആദി എന്ന സിനിമയ്ക്ക് ശേഷം പിന്നീട് ഇറങ്ങിയ ഇരുപത്തിയൊന്നാം നൂറ്റാണ്ട് വലിയ വിജയമായില്ലെങ്കിലും ഹൃദയത്തിലൂടെ പ്രേക്ഷകമനസുകളില്‍ ഇടം നേടാന്‍ പ്രണവിനായിരുന്നു. ഓരോ സിനിമകള്‍ക്കിടയിലും ഒരുപാട് ഇടവേള എടുക്കുന്നതിനാല്‍ തന്നെ സിനിമയില്‍ വലിയൊരു കരിയര്‍ സൃഷ്ടിക്കാന്‍ പ്രണവിന് ഇതുവരെ ആയിട്ടില്ല.
ഇപ്പോഴിതാ ദുല്‍ഖര്‍ സല്‍മാന്‍ കാണിച്ച വഴിയില്‍ തെലുങ്കില്‍ സജീവമാകാന്‍ ഒരുങ്ങുകയാണ് പ്രണവെന്നാണ് പുറത്തുവരുന്ന വിവരങ്ങള്‍. ജനതാ ഗാരേജ് എന്ന സിനിമയിലൂടെ മലയാളികള്‍ക്ക് സുപരിചിതനായ തെലുങ്ക് സംവിധായകന്‍ കൊരട്ടല ശിവ ഒരുക്കുന്ന സിനിമയിലാണ് പ്രണവ് അടുത്തതായി അഭിനയിക്കുക എന്നാണ് പുറത്തുവരുന്ന റിപ്പോര്‍ട്ടുകള്‍. തെലുങ്കിലെ വമ്പന്‍ പ്രൊഡക്ഷന്‍ ബാനറായ മൈത്രി മൂവി മേക്കേഴ്‌സാകും സിനിമ നിര്‍മിക്കുന്നത്. നിലവില്‍ പ്രണവുമായി സംവിധായകനും നിര്‍മാതാക്കളും ചര്‍ച്ച നടത്തിയതായാണ് വിവരങ്ങള്‍.
ജനതാ ഗാരേജ് എന്ന സിനിമയ്ക്ക് ശേഷം മഹേഷ് ബാബുവിനൊപ്പം ഭരത് അനെ നേനു എന്ന സിനിമയും ചിരഞ്ജീവിക്കൊപ്പം ആചാര്യ എന്ന സിനിമയും കൊരട്ടല ശിവ സംവിധാനം ചെയ്തിരുന്നു. ജൂനിയര്‍ എന്‍ടിആറിനൊപ്പം ചെയ്ത ദേവരയാണ് കൊരട്ടല ശിവയുടെ പുറത്തിറങ്ങാനുള്ള സിനിമ.
