കുപ്രസിദ്ധ കുറ്റവാളി ഓം പ്രകാശ് ഉള്‍പ്പെട്ട മയക്കുമരുന്ന് കേസില്‍ മലയാള സിനിമാതാരങ്ങളും. ഓം പ്രകാശിനെ സന്ദര്‍ശിച്ച താരങ്ങളുടെ പേരുവിവരങ്ങള്‍ പോലീസ് പുറത്തുവിട്ടു. യുവതാരങ്ങളായ പ്രയാഗ മാര്‍ട്ടിനും ശ്രീനാഥ് ഭാസിയും ഓം പ്രകാശിനെ സന്ദര്‍ശിച്ചിരുന്നതായാണ് ഇപ്പോള്‍ പുറത്തുവരുന്ന റിപ്പോര്‍ട്ടുകള്‍.
ലഹരിമരുന്ന് പാര്‍ട്ടി നടന്നതായി പോലീസ് സംശയിക്കുന്ന 3 മുറികള്‍ കേന്ദ്രീകരിച്ചായിരുന്നു പോലീസ് അന്വേഷണം. 20 പേരാണ് മൂന്ന് മുറികളില്‍ ഉണ്ടായിരുന്നത്. കഴിഞ്ഞ ദിവസമാണ് കുപ്രസിദ്ധ ഗുണ്ടാനേതാവായ ഓം പ്രകാശിനെയും കൂട്ടാളി ഷിഹാസിനെയും എറണാകുളം കുണ്ടന്നൂരിലെ നക്ഷത്ര ഹോട്ടലില്‍ നിന്നും പോലീസ് പിടികൂടിയത്. പോലീസ് നടത്തിയ പരിശോധനയില്‍ ഷിഹാസിന്റെ മുറിയില്‍ നിന്ന് രാസലഹരിയും മദ്യക്കുപ്പികളും പോലീസ് കണ്ടെടുത്തിരുന്നു.
ജാമ്യത്തില്‍ ഇറങ്ങിയ ഇവര്‍ കൊച്ചിയില്‍ വന്നതിനെ പറ്റി അന്വേഷണം നടത്തുകയായിരുന്നു പോലീസ്. സംഭവത്തിന്റെ അന്വേഷണം പുരോഗമിക്കവെയാണ് സിനിമാതാരങ്ങള്‍ ഇവരെ കാണാനെത്തിയ വിവരം പുറത്തുവന്നത്.
