'മാണിക്യ മലരായ പൂവി' എന്ന പഴയ മാപ്പിള ഗാനം ഇന്ന് ലോകം മുഴുവന്‍ ഏറ്റുപാടുകയാണ്. അതിന് കാരണം ‘ഒരു അഡാറ്‌ ലവ്’ എന്ന സിനിമയും അതിന്‍റെ സംവിധായകന്‍ ഒമറിന്‍റെ വ്യത്യസ്തമായ ചിന്തയും ഷാന്‍ റഹ്‌മാന്‍റെ സംഗീതവും പ്രിയ പ്രകാശ് വാര്യരുമാണ്. എന്തായാലും ചിത്രത്തിന്‍റെ ടീസറും ഇപ്പോള്‍ തരംഗമായി മാറുകയാണ്.
മാണിക്യമലരിലെ പുരികക്കൊടി കൊണ്ട് വന്‍ ഹിറ്റാക്കിയ പ്രിയ വാര്യരുടെ കണ്ണുകളും ആക്ഷനും തന്നെയാണ് ടീസറിന്‍റെയും ഹൈലൈറ്റ്. ടീസറിലും നിറഞ്ഞുനില്‍ക്കുന്നത് പ്രിയയും പ്രിയയുടെ കാമുകന്‍ റോഷന് അബ്‌ദുള്‍ റൌഫും മാത്രമാണ്. റോഷന് പ്രിയ ഒരു ഫ്ലൈയിംഗ് കിസ് നല്‍കുന്നതാണ് ടീസറിന്‍റെ പ്രമേയം.
'മാണിക്യ മലരായ പൂവി' എന്ന പഴയ മാപ്പിള ഗാനം സ്വതസിദ്ധ ശൈലിയില്‍ പുനരാവിഷ്ക്കരിച്ച ഷാന്‍ റഹ്മാന്‍ എന്നാല്‍ ടീസറിന് നല്‍കിയിരിക്കുന്നത് തട്ടത്തിന്‍ മറയത്തിലെ പ്രശസ്തമായ ബി ജി എം ആണ്.
നാലുദിവസം കൊണ്ട് 'മാണിക്യ മലരായ പൂവി' ഒരു കോടി പേര്‍ കെണ്ടെങ്കില്‍ ടീസറും ആ ഗണത്തിലേക്ക് കുതിക്കുന്നത്. വന്‍ വരവേല്‍പ്പാണ് ടീസറിനും ലഭിക്കുന്നത്. ആദ്യചിത്രമായ ഹാപ്പി വെഡ്ഡിംഗ് വന്‍ ഹിറ്റാക്കിയ ഒമര്‍ രണ്ടാം ചിത്രമായ ചങ്ക്‍സ് തകര്‍പ്പന്‍ വിജയമാക്കി മാറ്റിയിരുന്നു. എന്നാല്‍ ആ രണ്ട് സിനിമകളെയും വെല്ലുന്ന വിജയമായിരിക്കും ‘ഒരു അഡാറ്‌ ലവ്’ നേടുകയെന്ന് പ്രവചിക്കുന്ന ടീസറും ഗാനവുമൊക്കെയാണ് ഇപ്പോള്‍ പുറത്തുവന്നിരിക്കുന്നത്.